काठमाडौं । चर्को गर्मीमा कारमा फसेर २ वर्षीया बालिकाको मृत्यु भएको छ । उनी त्यसमा १५ घण्टा बसे । यस मामिलामा प्रहरीले पीडितका बुबा क्रिस्टोफर म्याक्लिन र आमा क्याथरिन एडम्सलाई पक्राउ गरेको छ ।

बच्चाको शरीरको तापक्रम ४१.६ डिग्री सेल्सियस पुगेको थियो । एक ४ वर्षीय बालकलाई पनि कारभित्रै बन्द गरिएको थियो तर उनी भाग्न सफल भएका थिए । उनलाई हाल बाल सुरक्षा सेवाको हेरचाहमा राखिएको छ।

डेली स्टारको रिपोर्ट अनुसार यो मामिला अमेरिकाको फ्लोरिडाको हो । यसबारे अनुसन्धान गर्दा ती बालबालिकाकी आमाले गाडीमा थुनेर बिर्सेको पाइएको थियो । सम्झिँदा उनले सानी बालिकालाई अचेत अवस्थामा भेट्टाइन् । उनले आकस्मिक नम्बरमा फोन गरिन् ।

त्यसपछि चिकित्सा सहायता पुग्दा सानी बालिकाको मृत्यु भइसकेको थियो । घटनामा यी आमाले आफ्ना दुई छोराछोरीलाई कारमा बिर्सेकी थिइन् र बच्चाहरू मध्यरातदेखि भोलिपल्ट दिउँसो ३ बजेसम्म कारमै बसेको प्रहरीले जनाएको छ । यो घटना मे १६ को हो ।

प्रहरी अधिकारीले भने, ‘दुवै बालबालिका कारमा सुतिरहेका थिए । उनीहरूले बच्चाहरूलाई कारमा छोड्ने निर्णय गरे र घरमा सुत्न गए। दिउँसो ३.४१ बजे उनको निद्रा खुल्यो र बच्चाहरु गाडीमा छन् भन्ने पत्तो नै भएन ।’

प्रहरीले दम्पतीको घरमा खोजी गर्दा लागुऔषध फेला परेको थियो । बालिकाको मृत्यु लागूऔषधका कारण भएको अधिकारीले बताएका छन् । लागुऔषधका कारण मानिसले वास्तविक संसारमा के भइरहेको छ भनी बिर्सन्छ र त्यसपछि यस्ता घटना हुने गरेको उनले बताए ।

प्रहरीले एडम्स र म्याक्लिनलाई पक्राउ गरेको छ । उनीहरुविरुद्ध लागुऔषध ओसारपसार र बालकलाई लापरवाही गरेको अभियोगमा मुद्दा दर्ता गरिएको छ । उनले शिशुको पोस्टमार्टमपछि दम्पतीमाथि थप मुद्दा लगाउन सकिने बताए ।