काठमाडौं । पाकिस्तानकी एक फेसन डिजाइनर यतिबेला चर्चामा छिन् । यी खातुन पाकिस्तानका पूर्व सेना प्रमुख आसिफ नवाज जञ्जुआकी नातिनी खादिजा शाह हुन्, जसलाई पक्राउ गरिएको छ । खादिजालाई मे ९ मा लाहोरको जिन्ना हाउसमा भएको हिंसाको मुख्य षड्यन्त्रकारी मध्ये एक भएको आरोप छ।

खादिजा शाह पेशाले फेसन डिजाइनर हुन् । उनी मे ९ मा सैन्य प्रतिष्ठानमा भएको आक्रमणको सम्बन्धमा पक्राउ परेका महिलामध्ये हुन्।

लाहोर प्रहरीले एक विज्ञप्तिमा भनेको छ कि पूर्व वित्तमन्त्री सलमान शाहकी छोरी खादिजा शाह जिन्ना हाउसमा मे ९ मा भएको हमलाको मुख्य षड्यन्त्रकारी मध्ये एक हुन्। उनलाई आतंकवादको आरोपमा पक्राउ गरिएको छ र सेना ऐन अन्तर्गत मुद्दा चलाउने सम्भावना छ।

प्रहरीले शाहलाई लाहोरको आतंकवाद विरोधी अदालतमा पेश गरेको जनाएको छ । गत मे ९ गते भएको हिंसाका घटनामा परेका ५ सयभन्दा बढी फरार महिलाको पहिचान पूरा भएको र १३८ विरुद्ध मुद्दा दर्ता भएको सरकारले जनाएको छ । यस सम्बन्धमा देशभरबाट करिब ८ हजार व्यक्तिलाई पक्राउ गरिएको छ, जसमध्ये अधिकांश पीटीआई नेता र पार्टी कार्यकर्ता छन्।

पाकिस्तानका पूर्व प्रधानमन्त्री तथा पाकिस्तान तहरीक-ए-इन्साफ (पीटीआई) का प्रमुख इमरान खानलाई अल कादिर ट्रस्ट मामिलामा मे ९ मा पक्राउ गरिएको थियो । उनलाई नेशनल एकाउन्टेबिलिटी ब्यूरो (एनएबी) र पाकिस्तानी रेंजर्सले इस्लामाबाद उच्च अदालत बाहिरबाट पक्राउ गरेको थियो, त्यसपछि देशव्यापी हंगामा भएको थियो।

पाकिस्तानका धेरै ठूला शहरहरूमा इमरान खानका समर्थकहरूले ठूलो संख्यामा सडकमा प्रदर्शन गरेका छन्। यसै क्रममा प्रधानमन्त्री शाहबाज सरिफको घरमा पनि पेट्रोल बम प्रहार गरिएको थियो । कमाण्डर हाउसलाई पनि निशाना बनाएको थियो । जमान पार्कबाट भाग्न खोजेका कमाण्डरको घरमा आक्रमणमा संलग्न १४ जनालाई प्रहरीले पक्राउ गरेको छ ।