काठमाडौं । पछिल्लो १५ महिनादेखि रुस–युक्रेन युद्ध चलिरहेको छ । यसैबीच, रूसले युक्रेनी राष्ट्रपति भोलोदिमिर जेलेन्स्कीको होलिडे पेन्टहाउस बेच्ने निर्णय गरेको छ। रूसले युक्रेनका राष्ट्रपति भोलोडिमिर जेलेन्स्कीको यो घरसँगै ५७ सम्पत्तिलाई सरकारी सम्पत्ति घोषणा गरेको छ । जेलेन्स्कीको यो घर उनकी श्रीमती ओलेना जेलेन्स्काको नाममा राखिएको छ । यो क्रिमियामा कालो सागरको तटमा निर्मित छ।

क्रिमियाका वक्ता भ्लादिमिर कोन्स्टान्टिनोभले भने- हामी यो घर बेच्न सूचना जारी गर्नेछौं। यसबाट प्राप्त हुने रकम युक्रेनमा चलिरहेको विशेष सैन्य कारबाही र युद्धमा मारिएका सैनिकका परिवारका लागि खर्च गरिनेछ । जेलेन्स्कीको पेन्टहाउस बेच्ने विषयमा रुसी नेताले क्रिमिया रुसको हिस्सा भएको बताए । हामी रूसका शत्रुहरूलाई यहाँको सम्पत्तिबाट लाभ उठाउन दिनेछैनौं। रुसले युद्धका क्रममा आफ्नो सेनामा ७ लाख करोड रुपैयाँभन्दा बढी खर्च गरेको छ ।

राष्ट्रपति जेलेन्स्कीकी पत्नी ओलेना जेलेन्स्काले २०१३ मा क्रिमियाको लिभाडिया शहरमा ३ कोठाको पेन्टहाउस किनेकी थिइन् । त्यसतिबेला यसको लागत करिब १ करोड ३५ लाख रुपैयाँ थियो । त्यसको एक वर्षपछि सन् २०१४ मा रुसले क्रिमियालाई गाभेको थियो। जेलेन्स्काले घर प्रयोग गर्न सकिनन् किनभने यो अझै पनि मर्मत हुँदै थियो। रुसी सरकारी सञ्चारमाध्यमले अहिले यो घरको मूल्य करिब ६.५ करोड रहेको बताएको छ ।

१९९१ मा युक्रेन स्वतन्त्र भएको थियो। क्रिमिया सधैं युक्रेनको भाग थिएन तर सोभियत नेताले युक्रेनलाई उपहारको रूपमा दिएका थिए। क्रिमियाका ६५ प्रतिशत मानिस रुसी मूलका छन् भने १५ प्रतिशत युक्रेनी मूलका छन्। २०१० मा, युक्रेनले रूससँग एक सम्झौतामा हस्ताक्षर गर्यो, जस अन्तर्गत रूसी सैन्य बेडालाई २५ वर्षको लागि क्रिमियामा बस्न अनुमति दिइएको थियो। बदलामा, रूसले ग्यासको मूल्य ३० प्रतिशतले घटाएको छ।