काठमाडौं । अमेरिकी अन्तरिक्ष एजेन्सी नासाले शुक्रबार दुईवटा उल्कापिण्ड पृथ्वीको निकै नजिकबाट गुज्रने बताएको छ । यी उल्कापिण्डहरूको नाम ‘एस्टेरोइड २०२३ जेबी३’ र ‘एस्टेरोइड २०२३ एलडी’ हो।

क्षुद्रग्रहहरू नजिक आउँदा ग्रहको गुरुत्वाकर्षण बलको प्रभावमा आउन सक्छन् । यस्तो अवस्थामा यो हाम्रो ग्रहतर्फ तानिएर पृथ्वीसँग ठोक्किने सम्भावना छ । तर, नासाले अहिलेसम्म कुनै चेतावनी दिएको छैन ।

अन्तरिक्षमा रहेका सबै क्षुद्रग्रहहरूको निगरानी गर्ने नासाको ‘जेट प्रोपल्सन ल्याबोरेटरी’का अनुसार ‘एस्टेरोइड २०२३ जेबी३’ को आकार १६० फिट रहेको छ। यो ६.९४ किलोमिटर प्रति सेकेन्डको गतिमा हाम्रो ग्रह तर्फ बढिरहेको छ। योसँगै ‘एस्टेरोइड २०२३ एलडी’ ५९ फिट अग्लो क्षुद्रग्रह हो, जुन ९ किलोमिटर प्रति सेकेण्डको गतिमा पृथ्वीतर्फ बढिरहेको छ ।

पृथ्वीको ७.५ मिलियन किलोमिटरको दायरा भित्र आउने क्षुद्रग्रहलाई ग्रहका लागि खतरा मानिन्छ। नासाका अनुसार ‘एस्टेरोइड २०२३ जेबी३’ पृथ्वीबाट ५४ लाख १३ हजार ६५० किलोमिटरको दुरीबाट गुज्रनेछ। योसँगै ‘एस्टेरोइड २०२३ एलडी’ ९ लाख ४८ हजार ४६७ किलोमिटर मात्रै पार गर्नेछ । तिनीहरू पृथ्वीको यति नजिक आउनु खतरनाक हुन सक्छ।

अधिकांश क्षुद्रग्रहहरु निकै साना छन् र पृथ्वीको वायुमण्डलमा आउने बित्तिकै उनीहरुको घर्षणले नष्ट भइसकेको हुन्छ र उनीहरुको बारेमा हामीलाई थाहा पनि छैन तर कतिपय यस्ता छन् जसको ठक्करले ठूला खाडल बन्छन् ।

लाखौं वर्ष पहिले पृथ्वीबाट डायनासोर लोप हुनु पनि क्षुद्रग्रहको टक्करका कारण भएको मानिन्छ । अर्थात्, विशाल क्षुद्रग्रहको टक्करबाट विशाल डायनासोरहरू हराउन सक्छन्, त्यसपछि अर्को टक्करबाट पृथ्वीमा जीवन पनि नष्ट हुन सक्छ।