काठमाडौं । फ्रान्सले आफ्नो राष्ट्रिय दिवस अर्थात् ब्यास्टिल डे अघि आतिशबाजी, पटाका राख्न वा एक ठाउँबाट अर्को ठाउँमा लैजान प्रतिबन्ध लगाएको छ।

सरकारले जुलाई १४ मा फ्रान्सको राष्ट्रिय दिवससँग सम्बन्धित कार्यक्रममा पाइरोटेक्निक विस्फोटक पदार्थको प्रयोगमा प्रतिबन्ध लगाउने आदेश जारी गरेको छ ।

गत महिना १७ वर्षीय नाहेल एमको प्रहरीले गोली हानी हत्या गरेपछि भड्किएको दंगालाई ध्यानमा राख्दै फ्रान्स सरकारले यो कदम चालेको हो ।

तर, स्थानीय प्रशासनले आयोजना गर्ने आतिशबाजीमा यो प्रतिबन्ध लागू हुने छैन ।

फ्रान्स सरकारले भनेको छ, “जुलाई १४ तारिख मनाउने क्रममा कुनै पनि प्रकारको शान्ति सुरक्षामा समस्या आउन नदिनका लागि कुनै पनि विस्फोटक पदार्थ एक ठाउँबाट अर्को ठाउँमा लैजान, खरिद गर्न, राख्न वा लैजान प्रतिबन्ध लगाइनेछ। जुलाई १५ सम्म देशमा आतिशबाजीमा पनि प्रतिबन्ध लगाइनेछ।”

गत महिना सुरु भएको हिंसाको समयमा आतिशबाजी प्रदर्शनकारीहरूको महत्त्वपूर्ण हतियार थियो। यो हिंसालाई फ्रान्समा विगत २० वर्षयताकै सबैभन्दा भीषण हिंसा मानिएको छ ।

सामान्य समयमा, बास्टिल दिवससँग सम्बन्धित उत्सवहरूमा, केही मानिसहरूले पटाका प्रहार गरेर आफ्नो विरोध व्यक्त गर्छन्। हालै भएका प्रदर्शनका क्रममा प्रहरीले ३ हजार ७ सय जनालाई नियन्त्रणमा लिएको थियो । जसमध्ये १ हजार १६० नाबालिग थिए ।