काठमाडौं। सप्तकोसी पुलबाट शुक्रबार मालबाहक ट्रक खसेको विषयमा रिपोर्टिङ गर्न आएका भारतीय पत्रकारले नेपाली पत्रकार तथा प्रहरी कर्मचारीमाथि गरेको दुर्वव्यहारको घटनामा पत्रकार महासंघ बेखबर देखिएको छ।

सप्तकोसी नदीमा खसेको ट्रकको विषयमा नेपाली भूमिमा प्रवेश गरेका भारतीय पत्रकारको दादागिरी असभ्य हर्कतले नेपाली पत्रकार र सशस्त्र प्रहरी माथि असभ्य व्यवहार भइरहँदा नेपाली पत्रकारहरुको छाता संगठन नेपाल पत्रकार महासंघले हालसम्म कुनै प्रतिक्रिया जनाउँन सकिरहेको छैन।

रिपोर्टिङका क्रममा पुगेका नेपालका पत्रकार सोनुकुमार दासले भारतीय मिडियाका रिपोर्टरहरुलाई नेपाल प्रवेशका लागि अनुमति कहाँबाट लिएको हो? भनेर जिज्ञासा राख्दा भारतीय पत्रकारले जिल्ला प्रशासन कार्यालयमा गाडी राखिएको बताए पनि उनले आफ्नो अनुमति प्रक्रिया बारे कुनै जानकारी दिन सकेका छैनन्।

अन्य मुलुकको पत्रकार नेपाली भूमिमा प्रवेश गरेर रिपोर्टिङ गरिरहँदा नेपाल सरकारसँग सम्बद्ध निकायको अनुमति लिन आवश्यक हुन्छ।

एकातिर आफैंले अनुमति नलिएरै नेपाली भूमिमा प्रवेश गरेका भारतीय पत्रकारले बलजफ्ती रुपमा त्यहाँ रहेका पत्रकार, सुरक्षाकर्मी र स्थानीयलाई अनावश्यक र अस्वभाविक प्रश्न हैरानी दिएका छन्।

भारतीय पत्रकारको टोलीमा आएकी एक महिलालले नेपाली पत्रकार माथि अपशब्द प्रयोग गर्दै दुर्व्यवहार गरेको भिडियो सामाजिक सञ्जालमा भाइरल भइरहेको छ।

भारतीय पत्रकारको टोलीमा आएकी एक महिलाको अपशब्दले समग्र नेपाली पत्रकारमाथि नै लज्जाबोध तुल्याएको छ। समग्र नेपाली पत्रकारमाथि नै भारतीय पत्रकारले अपमानजनक व्यवहार गर्दै हिन्दी भाषामा सोधिएको प्रश्नको जवाफ सोही भाषामा अनिवार्य रुपमा दिन भन्दै भारतीय पत्रकारले नेपालीमाथि ज्यादती गरेको प्रष्ट देखिन्छ।

भारतीय पत्रकारले हिन्दी भाषामा प्रश्न गर्दै त्यहाँस्थित नेपाली पत्रकार दास, सुरक्षाकर्मीलगायत अन्य स्थानीयलाई समेत गरिएको व्यवहार बारे नेपाली पत्रकारको साझा संस्था पत्रकार महासंघले हालसम्म संस्थागत धारणा सार्वजनिक गरेको छैन।

यस बारेमा नेपाल पत्रकार महासंघका अध्यक्ष विपुल पोखरेलसँग सम्पर्क गर्दा उनले भर्खरै आफूले जानकारी पाएको बताउँदै उनले महासंघका कोशी प्रदेश अध्यक्षसँग यसबारेमा थप जानकारी लिने प्रयत्न गरिरहेको बताए।

उनले भारतीय टेलिभिजन पत्रकारले नेपाली पत्रकारमाथि गरेको दुर्व्यवहारबारे पत्रकार महासंघको ध्यानाकर्षण भएको जनाए।

उनले भने, ‘यस विषयमा मैले हिजो बेलुकामात्रै जानकारी पाएँ। घटनाबारे थप बुझ्न कोसी प्रदेश अध्यक्षसँग सम्पर्क गर्न लागेका छौं।’ कोसी प्रदेशका अध्यक्षसँग थप जानकारी लिएर महासंघले यसबारेमा ठोस धारणा छिट्टै सार्वजनिक गर्ने उनको भनाइ छ।

उनले अगाडि भने, ‘यो घटनाबारे महासंघको ध्यानाकर्षण भएको छ। भारतीय पत्रकारले गरेको यस प्रकारको ज्यादती सैह्य छैन। यसबारेमा संस्थागत धारणा सार्वजनिक गर्ने तयारीमा छौं।’

उनले नेपाली भूमिमा प्रवेश गरेर भारतीय पत्रकारले गरेको अस्वभाविक हर्कतले समग्र नेपाली पत्रकार जगतकै अपमान भएको बताए।