काठमाडौं । पाकिस्तानका प्रधानमन्त्री शाहबाज शरीफले अगस्ट ९ मा नेशनल एसेम्बली भंग गर्ने घोषणा गरेका छन् । बिहीबार राति सांसदहरुको सम्मानमा रात्रिभोज र नेताहरुसँगको भेटपछि यस्तो निर्णय भएको हो । सो क्रममा शाहबाजले बैठकमा उपस्थित नेताहरूसँग देशको राजनीतिक अवस्थाका बारेमा गहिरो कुराकानी गरेका थिए ।

रिपोर्टहरूका अनुसार यस अवधिमा प्रधानमन्त्री शाहबाजले सांसदहरू र नेताहरूबाट जानकारी मागेका थिए र कार्यवाहक प्रधानमन्त्री र कार्यवाहक सरकारको व्यवस्थाबारे छलफल गरेका थिए। शाहबाजले विपक्षीसँग छलफल गरेर ३ दिनभित्र कार्यवाहक प्रधानमन्त्रीको नाम टुंगो लगाएर राष्ट्रपतिलाई बुझाउने बताएका छन् ।

अगस्ट ९ मा प्रधानमन्त्री शाहबाजले राष्ट्रिय सभा विघटनका लागि राष्ट्रपतिलाई औपचारिक सिफारिस गर्नेछन् । संवैधानिक व्यवस्थाअनुसार राष्ट्रपतिले ४८ घण्टाभित्र सिफारिसलाई लागू गर्न हस्ताक्षर गर्नुपर्छ । द एक्सप्रेस ट्रिब्युनको रिपोर्ट अनुसार राष्ट्रपतिले कुनै कारणवश सिफारिसमा हस्ताक्षर नगरेमा सभा स्वतः विघटन हुनेछ।

यति मात्र होइन राष्ट्रपतिले प्रधानमन्त्रीले सिफारिस गरेको कार्यवाहक प्रधानमन्त्रीको नाममा सहमति जनाएनन् भने पाकिस्तानको निर्वाचन आयोगले प्रस्तावित नामहरूबाट कार्यवाहक प्रधानमन्त्रीका लागि उम्मेदवार छनोट गर्नेछ।

डनको रिपोर्टका अनुसार पाकिस्तानका प्रधानमन्त्री शाहबाज शरीफले पाकिस्तानमा आगामी चुनाव २०२३ को डिजिटल जनगणनाको आधारमा हुने बताएका थिए। पाकिस्तानको वर्तमान विधानसभाको कार्यकाल अगस्ट १२ मा सकिँदैछ। निर्धारित समय पूरा भएमा ६० दिनभित्र निर्वाचन हुनेछ ।

तर, पाकिस्तानको संविधानले विधान सभाको कार्यकाल पूरा हुनुअघि विघटन भएमा ९० दिनभित्र निर्वाचन गरिसक्नुपर्ने उल्लेख गरेको छ ।