काठमाडौं । भारतका पूर्व केन्द्रीय मन्त्री र हाल इटावाबाट लोकसभा सांसद रामशंकर कथेरियालाई विशेष मजिस्ट्रेट सांसद-विधायक अदालतले विद्युत अधिकारीलाई कुटपिट गरेकोमा दोषी ठहर गरेको छ।

अदालतले कथेरियालाई ५० हजार जरिवाना र दुई वर्ष कैदको सजाय सुनाएको छ । १६ नोभेम्बर २०११ मा टोरेन्ट पावर लिमिटेडको आगरा कार्यालयका प्रबन्धक भावेश रसिकलाल शाहले बिजुली चोरी सम्बन्धी मुद्दाहरूको सुनुवाइ गर्दै थिए।

सो क्रममा स्थानीय सांसद रामशंकर कथेरिया र उनका समर्थकले म्यानेजर भावेश रसिकलाल शाहलाई कुटपिट गरेको र उनी गम्भीर घाइते भएको आरोप थियो ।

घटना पछि, भारतीय दण्ड संहिता (आईपीसी) को धारा १४७ र ३२३ अन्तर्गत सांसद रामशंकर कथेरिया र उनका अज्ञात समर्थकहरू विरुद्ध आगराको हरिपर्वत पुलिस स्टेशनमा मुद्दा दर्ता गरियो।

उक्त मुद्दामा बयान र बहसको प्रक्रिया सकिएपछि शनिबार फैसला सुनाइएको हो ।

सजायको घोषणापछि बीजेपी सांसद रामशंकर कथेरियाले पत्रकारहरूसँग कुरा गर्दै भने, ‘त्यतिबेला बसपाको सरकार थियो र यो मुद्दा राजनीतिबाट प्रेरित भएर लेखिएको थियो। अदालतको निर्णयलाई हृदयदेखि सम्मान गर्छु र पुनरावेदन गर्ने मेरो अधिकार प्रयोग गर्नेछु।’

सांसद रामशंकर कथेरियालाई दुई वर्षको जेल सजाय भइसकेपछि अहिले उनको संसद सदस्यता पनि संकटमा परेको छ ।

जनप्रतिनिधित्व ऐन, १९५१ अन्तर्गत सांसद वा विधायकको सदस्यता खारेज गर्न सकिन्छ।

यस कानूनमा फौजदारी मुद्दामा सजाय भोगेका सांसद वा विधायकको सदस्यता खारेज गर्ने व्यवस्था छ ।

यही कानुन अनुसार २ वर्षको सजाय सुनाइएपछि कांग्रेस संसदीय दलका नेता राहुल गान्धीलाई सांसदबाट निलम्बन गरिएको थियो । तर, सर्वोच्च अदालतले सजायमा रोक लगाएपछि गान्धी पुनर्बहाल भएका छन् ।