काठमाडौं । मलयालम फिल्मका चर्चित निर्देशक सिद्दिक इस्माइलको निधन भएको छ । उनको ६३ वर्षको उमेरमा हृदयघातका कारण निधन भएको हो । उनले सलमान खानको फिल्म ‘बडीगार्ड’ निर्देशन गरेका थिए ।

सिद्दिक इस्माइल मलयालम उद्योगका एक प्रसिद्ध निर्देशक थिए। केही दिनयता उनी निमोनिया र कलेजोको रोगबाट पीडित थिए । स्वास्थ्य बिग्रिएपछि उनलाई कोच्चिको अमृता अस्पतालमा भर्ना गरिएको थियो ।

उपचारका क्रममा उनलाई एक्स्ट्राकोरपोरियल मेम्ब्रेन (इसीएमओ) को सपोर्टमा राखिएको थियो । यसै क्रममा उनलाई हृदयघात भयो र उनले संसारलाई सदाका लागि विदा गरे ।

उनलाई बचाउन डाक्टरहरुले धेरै प्रयास गरे । उनी निको भएर घर आउने आशा सबैलाई थियो तर त्यो हुन सकेन । निर्देशकले आफ्नो करियर १९८९ को मलयालम फिल्म ‘रामजी राव स्पिकिङ’बाट सुरु गरेका थिए।

उनी ‘हरिहर नगर’, ‘गडफादर’, ‘काबुलीवाला’, ‘भियतनाम कालोनी’ र ‘हिटलर’ जस्ता चलचित्रबाट पनि परिचित छन् । उनको अन्तिम फिल्म ‘बिग ब्रदर’ थियो, जुन बक्स अफिसमा हिट साबित भयो । यस फिल्ममा सुपरस्टार मोहनलाल र अभिनेता अरबाज खान मुख्य भूमिकामा थिए ।

सिद्दीक उत्कृष्ट निर्देशनका लागि परिचित थिए । सलमान खानको फिल्म ‘बडीगार्ड’ उनको निर्देशनमा बनेको उत्कृष्ट फिल्ममध्ये एक थियो । यो फिल्म २०११ मा रिलिज भएको थियो, जसलाई यस्तो उत्कृष्ट तरिकाले निर्देशन गरिएको थियो कि फिल्मले ठूलो पर्दामा गहिरो छाप छोड्यो। ‘बडीगार्ड’ को तमिल संस्करण पनि सिद्दिकले निर्देशन गरेका थिए, जसको नाम ‘कावलन’ थियो।

सिद्दीकी जति राम्रो निर्देशक थिए त्यति नै राम्रो अभिनेता पनि थिए । २०२२ मा, उनी फिल्म केनकेमममा विशेष भूमिकामा देखा परेका थिए। सानो भूमिकामा उनले आफ्नो अभिनयले सबैको ध्यान खिचे ।

सिद्दिकको निधनको खबरले उद्योगमा शोकको लहर ल्याएको छ । दुल्कर सलमान र एटली जस्ता धेरै सेलिब्रेटीहरूले निर्देशकको आकस्मिक निधनमा शोक व्यक्त गरेका छन्। सिद्दिक इस्माइलले जहिले पनि फिल्म निर्देशन गरे, उनले त्यसलाई फरक ढंगले बनाउने प्रयास गरे ।