काठमाडौं । पाकिस्तानको निर्वाचन आयोगले मंगलबार पूर्वप्रधानमन्त्री इमरान खानलाई आगामी ५ वर्षका लागि चुनाव लड्न प्रतिबन्ध लगाएको जनाएको छ ।

इमरान खानलाई हालै तोशाखाना मुद्दामा जेल पठाइएको छ । उनी विगत केही महिनादेखि पाकिस्तानका विभिन्न अदालतमा आफूविरुद्ध लगाइएको आरोपलाई चुनौती दिइरहेका थिए।

तर अन्ततः अगस्ट ५ मा इमरान खानलाई तीन वर्षको जेल सजाय सुनाइएको थियो, जसको लगत्तै उनलाई पक्राउ गरिएको थियो ।

गिरफ्तार हुनुअघि रेकर्ड गरिएको बयानमा इमरान खानले आफ्ना समर्थकहरूलाई आफू पक्राउ पर्दा चुप लागेर नबस्न भनेका थिए, तर चाखलाग्दो कुरा के छ भने यसपटक उनका समर्थकहरूको प्रतिक्रिया पहिलेको जस्तो देखिएको छैन।

इमरान खानको पार्टी पाकिस्तान तहरिक–ए–इन्साफ (पीटीआई) ले पूर्वप्रधानमन्त्रीको गिरफ्तारीविरुद्ध देशव्यापी प्रदर्शनको आह्वान गरेको छ ।

इमरान खान सन् २०१८ मा पाकिस्तानको प्रधानमन्त्री निर्वाचित भएका थिए तर अविश्वासको प्रस्तावमा पराजित भएपछि एक वर्षअघि पदबाट राजीनामा दिनुपरेको थियो । उनीविरुद्ध एक सयभन्दा बढी मुद्दा दर्ता छन् ।

इमरान खानमाथि प्रधानमन्त्री पदमा रहँदा आफ्नो फाइदाका लागि महँगो उपहार बेचेको आरोप लागेको छ । इमरान खानले निर्वाचन आयोगलाई दिएको घोषणामा आफ्नो सम्पत्तिको विवरण दिएका छैनन् ।

निर्वाचन आयोगले पछि जिल्ला अदालतमा इमरान खानले प्रधानमन्त्री हुँदा आफूले पाएको उपहार बेचेको र त्यसमा फौजदारी कानुन बमोजिम कारबाही हुनुपर्ने भन्दै उजुरी दायर गरेको थियो । इमरान खानले प्रधानमन्त्री रहँदा आफ्नो फाइदाका लागि महँगो उपहार र तोशाखानाको घडी बेचेको आरोप छ ।

तोशखाना पाकिस्तानमा सन् १९७४ मा स्थापना भएको थियो। यो मन्त्रिपरिषद् डिभिजनको प्रशासनिक नियन्त्रणमा रहेको सरकारी विभाग हो जहाँ देशका प्रमुख, मन्त्री, कर्मचारी, विदेशी सरकारका सांसद वा अधिकारीहरूबाट प्राप्त महँगो उपहारहरू राखिन्छन्।

यहाँ प्रधानमन्त्री, राष्ट्रपति वा अन्य वरिष्ठ अधिकारीहरूले भ्रमणका क्रममा प्राप्त गरेका बहुमूल्य उपहारहरू राखिन्छन्।

कुनै पनि विदेश यात्राको समयमा परराष्ट्र मन्त्रालयका अधिकारीहरूले ती उपहारहरूको अभिलेख राख्छन् र स्वदेश फर्किएपछि तोशाखानामा जम्मा गरिन्छ।

तोसखानामा राखिएका वस्तुलाई सम्झनाको रुपमा हेरिन्छ । यहाँ राखिएका सामान मन्त्रिपरिषद्को स्वीकृतिपछि मात्र बिक्री गर्न सकिनेछ ।

पाकिस्तानमा प्राप्त उपहारको मूल्य ३० हजार रुपैयाँभन्दा कम भएमा उक्त व्यक्तिले आफूसँग सित्तैमा राख्न सक्छ ।

अर्कोतर्फ उपहारको मूल्य ३० हजार रुपैयाँभन्दा बढी भए सो लागतको ५० प्रतिशत जम्मा गरेर खरिद गर्न सकिनेछ । सन् २०२० अघि सामानको वास्तविक मूल्यको २० प्रतिशत मात्रै जम्मा गर्नुपर्ने थियो ।

यी उपहारहरूमा सामान्यतया महँगो घडीहरू, सुन र हिराका गहनाहरू, महँगो गहनाहरू, स्मृति चिन्हहरू, हीराले जडित कलमहरू, क्रोकरी र कार्पेटहरू समावेश हुन्छन्।