काठमाडौं । इस्लामिक राष्ट्र इरानमा एउटा शिया धार्मिकस्थलमा हमला भएको छ, जसमा एक जनाको मृत्यु भएको छ । इरानको सरकारी सञ्चारमाध्यमले आइतवार इरानी सहर शिराजमा रहेको शाह चिराग तीर्थस्थलमा ‘आतंकवादी’ आक्रमण भएको जनाएको छ । यो दरगाह इरानको सबैभन्दा महत्त्वपूर्ण धार्मिक स्थलहरू मध्ये एक हो।

इरानको आधिकारिक समाचार एजेन्सी इरनाले रिपोर्ट गरेअनुसार एक हतियारधारी आक्रमणकारीले शाह चिराग दरगाहमा प्रवेश गर्ने प्रयास गरे र त्यहाँ पुगेका मानिसहरूमाथि गोली चलाए। तर, उनलाई छिट्टै हिरासतमा लिइयो ।

गत अक्टोबरमा पनि शाह चिराग दरगाहलाई निशाना बनाइएको थियो जसमा १३ जनाको मृत्यु भएको थियो । उक्त आक्रमणको जिम्मेवारी आतंकवादी संगठन इस्लामिक स्टेटले लिएको थियो ।

इरानको सरकारी सञ्चारमाध्यमले पहिले आक्रमणमा दुई व्यक्ति संलग्न रहेको र चार जनाको ज्यान गएको बताएको थियो। तर पछि यो हमलामा एक जनाको मात्रै संलग्नता रहेको र एक जनाको मात्र मृत्यु भएको बताइयो । आक्रमणमा आठ जना घाइते भएको पनि बताइएको छ ।

इरानको सैन्य इस्लामिक रिभोलुसनरी गार्ड्स कोर्प्सका कमाण्डर यादोल्ला बोउलीले भने, “एक आतंककारीले दरगाहको गेटमा प्रवेश गरे र युद्धको राइफलले फायरिङ गरे।”

सरकार समर्थित फार्स समाचार एजेन्सीका अनुसार बन्दुकधारीले बाब अल-महदी ढोकाबाट दरगाहमा प्रवेश गर्ने प्रयास गरेको थियो। तर, सुरक्षाकर्मीले उनलाई त्यहीँ बस्न भनेका थिए । सुरक्षाकर्मीले उनलाई रोकेपछि उनले अन्धाधुन्ध गोली चलाउन थालेको प्रत्यक्षदर्शीले एजेन्सीलाई बताए ।

अर्को इरानी समाचार एजेन्सी तस्निमले आक्रमणमा कम्तीमा सात जना घाइते भएको बताएको छ । अराजकतालाई ध्यानमा राख्दै यस क्षेत्रका पसलहरू बन्द गरिएको थियो। सरकारी टिभीले दरगाहलाई चारैतिरबाट सुरक्षा बलले घेरेको र वरपरको सुरक्षा व्यवस्था कडा पारिएको जनाएको छ ।

टिभीमा देखाइएका तस्बिरहरूमा दरगाहको प्रवेशद्वारका झ्यालहरूमा गोलीका प्वालहरू देखिन्छन्। मन्दिरमा सातौं शिया इमाम मुसा अल-कादिमका दुई छोराहरूको चिहानहरू छन्, जो आठौं इमाम अली अल-रिदाका भाइ पनि हुन्।

गत महिना मात्रै इरानले अक्टोबरमा मन्दिरमा आक्रमण गरेको आरोपमा दुई जनालाई मृत्युदण्डको सजाय सुनाएको थियो। अक्टोबरमा भएको हमलाका मुख्य अभियुक्त ३० वर्षीय अफगान नागरिक हमीद बदख्सान थिए, जसको आक्रमणको क्रममा प्रहरीहरूले घटनास्थलमा नै ज्यान गुमाएका थिए।

तीन दोषीलाई इस्लामिक स्टेटसँग सम्बन्ध भएको आरोपमा २५ वर्षको जेल सजाय सुनाइएको छ। इस्लामिक स्टेटले इरानमा यसअघि पनि धार्मिक स्थल र सरकारी भवनलाई निशाना बनाउँदै आएको छ । आईएसले सन् २०१७ मा इरानमा दुईवटा आक्रमण गरेको थियो । एउटा हमला इरानको संसदमा भएको थियो भने दोस्रो आक्रमण इरानको इस्लामिर गणराज्यका संस्थापक आयतोल्लाह रुहोल्लाह खोमेनीको चिहानमा भएको थियो ।