काठमाडौं । हिमाचल प्रदेशको राजधानी शिमलाको शिवमन्दिर बब्दी नजिक गत अगस्ट १४ मा भएको दुर्घटनामा अहिलेसम्म १६ जनाको शव भेटिएको छ ।

यस घटनामा करिब २१ जनाको मृत्यु भएको आशंका गरिएको छ । अझै चार–पाँच जना भग्नावशेषमुनि पुरिएको आशंका गरिएको छ । उनीहरुको खोजी जारी छ ।

भारतीय सेना, एनडीआरएफ, एसडीआरएफ, पुलिस, होमगार्ड र ठूलो संख्यामा स्थानीय मानिसहरू यस स्थानमा खोजी अभियानमा संलग्न छन्।

यस ठाउँमा ठूलो संख्यामा देवदार रूखहरू, भग्नावशेष र रेलवे ट्र्याकहरूको उपस्थिति सबैभन्दा ठूलो चुनौती हो। जसका कारण यहाँ खोजी कार्यमा ठूलो कठिनाइ भइरहेको छ ।

यहाँको सबैभन्दा ठूलो समस्या यस पहाडको ढलान हो, जसका कारण यहाँ बनेको नालीमा जेसीबी र अन्य मेसिनरी बोक्न सजिलो छैन ।

पहिरोले बनेको यो नालीमा कैयौं टन फोहोर जम्मा हुँदा प्रशासन र स्थानीयवासीलाई निकै समस्या भएको छ ।

हिमाचलमा यो बर्षा र पहिरोले धेरै क्षति पुर्याएको छ, जसका कारण हिमाचलमा ९ हजार भन्दा बढी घरहरु आंशिक र धेरै पूर्ण रुपमा क्षतिग्रस्त भएका छन् ।

यो वर्षामा करिब ११ हजार मानिस घरबार र ठाउँबाट पलायन भएका छन् भने यो मनसुनी वर्षामा करिब ३३० जनाको ज्यान गएको छ ।

राज्य सरकारका अनुसार पछिल्लो ५५ दिनमा यस वर्षा, बाढी र पहिरोका कारण १० हजार करोडभन्दा बढीको क्षति भएको अनुमान गरिएको छ ।