काठमाडौं । रुसको आक्रमणपछि युक्रेनले आफ्ना सहयोगीहरूलाई लडाकु विमान उपलब्ध गराउन लगातार माग गर्दै आएको थियो । अब अमेरिकाले डेनमार्क र नेदरल्याण्डको माध्यमबाट युक्रेनलाई केही एफ–१६ लडाकु विमान दिन स्वीकृति दिएको छ ।

एक अमेरिकी अधिकारीले भनेअनुसार वाशिंगटनले डेनमार्क र नेदरल्यान्ड्सलाई आश्वस्त गरेको छ कि पाइलटहरूलाई तालिम दिएपछि युक्रेनलाई एफ-१६ एस पठाउने प्रक्रियालाई तीव्रता दिइनेछ।

यसैबीच अमेरिकाको यो निर्णयलाई नेदरल्याण्डका विदेशमन्त्री वोप्के हाकेस्ट्राले स्वागत गरेका छन् । “हामी युक्रेनमा एफ-१६ लडाकु विमानहरू पठाउने बाटो खोल्ने वाशिंगटनको निर्णयलाई स्वागत गर्दछौं,” उनले सोशल मिडिया प्लेटफर्म एक्समा लेखे।

डेनमार्कले युक्रेनलाई जेट उपलब्ध गराउने विषयमा अब छलफल हुने बताएको छ । रक्षामन्त्री ज्याकोब एलेमान-जेन्सेनले भने, “सरकारले धेरै पटक भनेको छ कि तालिम पछि अर्को चरण युक्रेनमा जेटहरू पठाउने हो। हामी यसबारे नजिकका साझेदारहरूसँग छलफल गरिरहेका छौं र मलाई आशा छ कि हामी यो प्रक्रिया छिट्टै सुरु गर्नेछौं।”

डेनमार्कको रक्षा मन्त्रालयले शुक्रबार भनेको छ कि ११ राष्ट्रको गठबन्धनले युक्रेनी पाइलटहरूलाई यस महिनाको अन्त्यमा डेनमार्कमा एफ-१६ लडाकु विमान उडान गर्न प्रशिक्षण दिनेछ। नेटो सदस्यहरू डेनमार्क र नेदरल्याण्ड्सले पाइलटहरूलाई तालिम दिने र चालक दलहरूलाई समर्थन गर्ने र युक्रेनलाई रूससँगको युद्धमा प्रयोगको लागि एफ-१६ प्राप्त गर्न सक्षम पार्ने अन्तर्राष्ट्रिय प्रयासको नेतृत्व गरिरहेका छन्।