काठमाडौं । भारतले सेप्टेम्बर २ मा सूर्यको अध्ययन गर्न नयाँ मिसन सुरु गर्ने भएको छ ।

यसअघि प्लानेटरी सोसाइटीका निर्देशक रघुनन्दन कुमारले सूर्यको अध्ययन गर्न पठाइने भूउपग्रहलाई कति समय लाग्छ र यो मिसन कति लामो हुन्छ भन्ने बारेमा बताएका छन् ।

रघुनन्दन कुमारले समाचार एजेन्सी पीटीआईलाई भने, “आदित्य-एल १ मिसनले चार महिनामा १५ लाख किलोमिटरको यात्रा तय गर्नेछ। “एउटा बिन्दुमा पुगेपछि हामी सात यन्त्रको सहायताले अर्को पाँच वर्षसम्म सूर्यको अध्ययन गर्नेछौं।”

भारतीय अन्तरिक्ष अनुसन्धान संगठन (इसरो) ले सेप्टेम्बर २, २०२३ मा श्रीहरिकोटाबाट बिहान ११:५० बजे सूर्यको अध्ययन गर्न ‘आदित्य एल-१’ उपग्रह प्रक्षेपण गर्नेछ।

सूर्यको अध्ययन गर्ने यो भारतको पहिलो अन्तरिक्ष मिशन हो।

भर्खरै, इसरोले यस बारे एक विज्ञप्ति जारी गरी भन्यो – “आदित्य एल-१’ सूर्यको अध्ययन गर्ने पहिलो अन्तरिक्षमा आधारित भारतीय मिसन हुनेछ। अन्तरिक्षयानलाई सूर्य-पृथ्वी प्रणालीको लेग्रेन्ज बिन्दु १ (एल १) वरिपरि हलो कक्षामा पठाइनेछ, जुन पृथ्वीबाट करिब १.५ मिलियन किलोमिटर टाढा छ।

अन्तरिक्षयानले सातवटा पेलोड बोक्ने छ जसले फोटोस्फियर, क्रोमोस्फियर र सूर्यको बाहिरी तहको अध्ययन गर्नेछ।