काठमाडौँ । साहित्यकार तथा पत्रकार राजेन्द्र पराजुलीको निधन भएको छ । पराजुलीको ललितपुरको ग्वार्कोस्थित बी एण्ड बी अस्पतालमा उपचारको क्रममा निधन भएको हो ।

पारिवारिक स्रोतका अनुसार निमोनिया बल्झिएपछि अस्पताल भर्ना गरिएका पराजुलीको मंगलबार बिहान निधन भएको हो । उनको आजै दिउँसो पशुपति आर्यघाटमा दाहसंस्कार गर्ने परिवारले तयारी गरेको छ ।

पराजुलीको कथासंग्रह ‘जन्तरमन्तर’ हालै मात्र प्रकाशनमा आएको थियो । उनका अघोरी, कोटेश्वरको केटो, शुक्रराज शास्त्रीको चश्मा, अनायिका, सपनामा मार्क्स, जाडोमा भोक, भ्रष्ट संवेदना, विकल्प यात्रालगायत कृति प्रकाशित छन् ।

मुख्य गरी कथा लेखनका लागि चिनिएका पराजुलीले लामो समय अखबारका लागि पत्रकारिता पनि गरे ।