काठमाडौं । मुम्बईको एक अदालतले जेट एयरवेजका संस्थापक नरेश गोयललाई बैंक ठगी मुद्दामा १४ दिनको न्यायिक हिरासतमा पठाएको छ।

गोयलमाथि क्यानरा बैंकको ५३८ करोड रुपैयाँ ठगी गरेको आरोप छ। प्रवर्तन निर्देशनालय (ईडी) ले सेप्टेम्बर १ मा मनी लन्ड्रिंग ऐन पीएमएलए अन्तर्गत उनलाई पक्राउ गरेको थियो।

७४ वर्षीय व्यापारी नरेश गोयललाई ईडी रिमाण्डपछि बिहीबार अदालतमा पेश गरिएको थियो। अनुसन्धान एजेन्सीले थप हिरासतमा राख्न माग नगरेपछि उनलाई न्यायिक हिरासतमा पठाइएको थियो।

सीबीआईले जेट एयरवेज, नरेश गोयल र उनकी पत्नी अनिता र हाल बन्द भएको एयरलाइनका केही अधिकारीहरू विरुद्ध क्यानरा बैंकसँग ५३८ करोड रुपैयाँको ठगी मुद्दामा मनी लान्ड्रिंग मुद्दा दर्ता गरेको थियो।

यो एफआईआर बैंकको उजुरीको आधारमा दर्ता गरिएको थियो जसमा जेट एयरवेज इन्डिया लिमिटेडलाई ८४८.८६ करोड रुपैयाँको क्रेडिट सीमा र ऋण स्वीकृत गरिएको थियो, जसमध्ये ५३८.६२ करोड रुपैयाँ बाँकी रहेको आरोप लगाइएको थियो।