काठमाडौं । पाकिस्तानको निजी टिभी च्यानल ‘एक्सप्रेस न्युज’को प्राइम टाइम टक शोका क्रममा भएको आक्रमणको भिडियो क्लिपको पाकिस्तानको सामाजिक सञ्जालमा निकै चर्चा भइरहेको छ ।

भाइरल भएको यो भिडियो क्लिपमा पाहुनाहरु बिचमा झगडा गर्न थालेको र दुबै बिच हानाहान सुरु भएको देख्न सकिन्छ ।

यी दुई अतिथिहरू पीएमएल-एन सिनेटर डा. अफनानुल्लाह खान र पीटीआई कोर कमिटी सदस्य तथा वकिल शेर अफजल खान मारवत हुन्।

तर, यो कार्यक्रम प्रत्यक्ष प्रसारण थिएन र बुधबार रेकर्ड गरिएको थियो ।

सोशल मिडियामा केही प्रयोगकर्ताहरूले स्टुडियोमा भएको झगडाको आलोचना गरिरहेका छन् भने केहीले एन्करको भूमिकामाथि प्रश्न उठाइरहेका छन् ।

जावेद चौधरीको शोमा झगडाका घटना किन हुन्छन् र जावेद चौधरीले यसलाई रोक्न पर्याप्त कदम किन नचालेको भन्ने प्रश्न पनि कतिपयले उठाइरहेका छन् ।

पीएमएल-एन नेता डा. अफनानुल्लाह खान र इमरान खानको पार्टी पीटीआईका शेर अफजल खान मारवत एकअर्काको राजनीतिक नेतृत्वको चरित्रमाथि प्रश्न उठाउँछन् र विवाद बढ्दै जाँदा उनीहरूले एकअर्कालाई मौखिक आक्रमण गर्छन्।

यसैबीच कार्यक्रमका एन्कर जावेद चौधरीले हस्तक्षेप गर्ने प्रयास गरेका छन् ।

त्यही समयमा अफजल खान मारवत आफ्नो सिटबाट उठ्छन् र डाक्टर अफनानुल्लाह खानलाई थप्पड हाने। त्यसपछि दुवै पाहुना हात हालाहाल गर्न थाल्छन् ।

बुधबार राति उक्त रेकर्डिङपछि उक्त कार्यक्रम टिभीमा पनि प्रसारण भएको थियो तर लडाइँको भाग काटिएको थियो ।

तर, वरिष्ठ पत्रकार तथा एन्कर जावेद चौधरीको कार्यक्रममा यस्तो भएको यो पहिलो पटक भने होइन ।

यसअघि पनि २०२१ जुनमा उनको एउटा कार्यक्रममा तत्कालीन पीटीआई नेता फिरदौस आशिक अवानले पीपीपी नेता कादिर मण्डुखेललाई थप्पड हानेका थिए ।