काठमाडौं । कन्नड फिल्मका अभिनेता नागभूषणको कार दुर्घटना भएको छ । हिजो राति नागभूषणको कारले फुटपाथमा हिँडिरहेका एक जोडीलाई ठक्कर दिएको थियो । उक्त दुर्घटनामा महिलाको मृत्यु भएको छ भने उनका श्रीमान गम्भीर अवस्थामा अस्पतालमा उपचाररत छन् ।

यस भयानक दुर्घटनामा प्रहरीले नागभूषण विरुद्ध मुद्दा दर्ता गरेको छ र यस विषयमा अनुसन्धान भइरहेको छ। शनिबार राति दम्पती फुटपाथमा हिड्दै गर्दा नागभूषणको कारले ठक्कर दिएको थियो । जोडीलाई ठक्कर दिएपछि अभिनेताको कार फुटपाथमा रहेको बिजुलीको पोलमा ठोक्कियो ।

जानकारीका अनुसार यो दुर्घटना बेंगलुरुको वसन्त पुरी मेन रोडमा भएको हो । अभिनेता नागभूषण उत्तरहल्लीबाट कोननकुन्टेतर्फ जाँदै थिए । उनको तीव्र गतिको कारले फुटपाथमा हिँडिरहेका एक जोडीलाई ठक्कर दिएको थियो। यो दुर्घटनापछि नागभूषण आफैले दम्पतीलाई अस्पताल लगे । ४८ वर्षीया प्रेमाको अस्पताल लैजाँदै गर्दा बाटोमै मृत्यु भएको हो ।

प्रेमाका श्रीमान् कृष्ण (५८) को दुवै खुट्टा, टाउको र पेटमा चोट लागेको छ । कृष्णको अवस्था चिन्ताजनक रहेको र उनको बेंगलुरुको एक निजी अस्पतालमा उपचार भइरहेको बताइएको छ । यस गम्भीर मामिलामा बेंगलुरुको कुमारस्वामी ट्राफिक पुलिस स्टेशनमा एफआईआर दर्ता गरिएको छ। प्रहरीले यस घटनामा नागभूषणलाई ओभरस्पिड र लापरवाही गरेको आरोप लगाएको छ । घटनाको अनुसन्धान भइरहेको छ ।

नागभूषण कन्नड चलचित्रहरूमा धेरै लोकप्रिय सहायक भूमिकाहरूमा देखा परेका छन्। उनले ‘युवरत्न’, ‘लकी म्यान’ र ‘डेयरडेभिल मुस्तफा’ जस्ता फिल्ममा काम गरिसकेका छन् । नागभूषण अभिनित कन्नड फिल्म ‘तगारु पल्या’ नोभेम्बरमा रिलिज हुँदैछ ।