काठमाडौं । सिङ्गापुरमा ठूलो पारिवारिक कार किन्नका लागि अब १०६,६१९ डलर अर्थात १ करोड ४० लाख रुपैयाँको प्रमाणपत्र लिनुपर्नेछ ।

सडकमा सवारीको चाप कम गर्ने उद्देश्यले सन् १९९० मा सिङ्गापुर सरकारले १० वर्षको अवधिका लागि सर्टिफिकेट अफ एन्टाइटलमेन्ट (सीओई) खरिद गर्ने व्यवस्था गरेको थियो ।

यस प्रावधानका कारण, सिंगापुरमा निजी कारको स्वामित्व लिन यो प्रमाणपत्र खरिद गर्न आवश्यक छ। यो प्रमाणपत्र प्रत्येक दुई हप्तामा लिलामी हुन्छ र यसको बिक्री र नम्बर सरकारको नियन्त्रणमा हुन्छ।

कर र आयात शुल्कसहितको यो प्रावधानसँगै सिंगापुर कारको स्वामित्वमा विश्वकै सबैभन्दा महँगो देश बनेको छ । उदाहरणका लागि, सिंगापुरमा टोयोटा क्यामरी हाइब्रिडको मूल्य सीओइ र करहरू सहित २ लाख ५० हजार डलर (३ करोड ३० लाख रूपैयाँ) छ।

अमेरिकामा सोही कारको मूल्य योभन्दा ६ गुणा कम छ । तर विभिन्न सवारीसाधन अनुसार यो प्रमाणपत्रको मूल्य फरक–फरक हुन्छ । उदाहरणका लागि, मोटरसाइकल र साना सवारीका लागि प्रमाणपत्रको मूल्य ठूला सवारी र व्यावसायिक सवारी साधनहरूको तुलनामा कम छ।

सिंगापुर विश्वका थोरै देशहरू मध्ये एक हो जहाँ सार्वजनिक यातायात राम्रो अवस्थामा छ। सिंगापुर सरकारले आफ्ना नागरिकहरूलाई सार्वजनिक यातायात प्रणाली प्रयोग गर्न प्रोत्साहित गर्दछ।