गाजा। इजरायलमा भएको आक्रमणले मानिसहरूलाई अमेरिकामा भएको ९/११ आतंकवादी हमलाको सम्झना गराएको छ।

मध्यपूर्वका केही विश्लेषकका अनुसार हमासले इजरायललाई पहिले कहिल्यै यस्तो ठूलो पीडा दिएको थिएन। आफैंमाथिको यो हमलापछि इजरायली सेनाले प्यालेस्टाइन, गाजा र आसपासका क्षेत्रमा रहेका हमाश समूह माथि आक्रमण गरिरहेको छ।

प्यालेस्टिनी स्वास्थ्य मन्त्रीले इजरायलको जवाफी कारबाहीमा गाजामा आफ्ना करिब २ सय जना मारिएका र करिब २ हजार भन्दा बढी घाइते भएको दाबी गरेका छन्। जबकि इजरायलमा मृत्यु हुनेको संख्या २ सय पुगेको छ। अबेर राति, हमासले फेरि इजरायलमा १५० रकेटहरू प्रहार गर्‍यो, जसमध्ये धेरैलाई आइरन डोम रक्षा प्रणालीले नष्ट गरेको थियो।

रुसी मिडिया एजेन्सी स्पुतनिकका अनुसार प्यालेस्टाइनसँगको तनावका कारण इजरायलमा ज्यान गुमाउनेको संख्या ७७९ पुगेको छ। इजरायली सेनालेका अनुसार अझै पनि २० भन्दा बढी मोर्चाहरूमा लडाईं जारी छ।

इजरायलका सुरक्षा बलका शीर्ष प्रवक्ता रियर एडमिरल ड्यानियल हगारीले गाजा पट्टीमा हमास आतंकवादी समूहले इजरायलीहरूलाई बन्धक बनाएर राखेको पुष्टि गरेका छन्।

हागारीका अनुसार दक्षिणी इजरायलमा २२ स्थानहरूमा अझै पनि लडाई जारी छ।उनी भन्छन्,-इजरायली सैनिकहरू गाजा सीमाका सबै शहरहरूमा पुगेका छन् र त्यहाँ उपस्थित सबै व्यक्तिको स्क्यान गरिरहेका छन्।’

हागारीले गाजा सिमानामा चारवटा डिभिजन तैनाथ गरिएको र त्यहाँ पहिले नै रहेको ३१ वटा बटालियनमा सामेल भइरहेको बताए। इजरायलले हमासलाई पूर्ण रूपमा ध्वस्त पार्ने बताएको छ। उनका अनुसार हमासले यस युद्धको ठूलो मूल्य चुकाउनु पर्ने छ।

उता, हमास समूहले इजरायलमा आक्रमण गरेपछि इजरायलले आफ्नो राज्य सञ्चालित बिजुली कम्पनीलाई शनिबार गाजा पट्टीमा आपूर्ति रोक्न आदेश दिएको ऊर्जा मन्त्रीले बताए।

‘मैले (इजरायल) इलेक्ट्रिक कम्पनीलाई गाजामा बिजुली आपूर्ति रोक्न निर्देशन दिने आदेशमा हस्ताक्षर गरेको छु, ऊर्जा मन्त्री इजरायल काट्जले एक विज्ञप्तिमा भने।