काठमाडौं। सांगीतिक व्याण्ड एक्सिसले ६ वर्षपछि नयाँ गीत ‘पाइला’ सार्वजनिक गरेको छ। व्याण्डले आफ्नो अफिसियल युट्युब च्यानलबाट आइतबार यो गीत सार्वजनिक गरेको हो।

व्याण्डले पोजेटिभ भाइब्स इन्टरटेनमेन्ट नेटवर्क प्रालि (पीभीई नेटवर्क)को प्रस्तुतीमा यो गीत बजारमा ल्याएको हो। व्याण्डले यो गीतसँगै ‘एक्लो जीवन’, ‘पैसा’ र ‘विस्तारै’ बोलको गीत पनि तयार पारेको छ।

गीत ‘पाइला’मा व्यक्तिलाई हार नमानी जीवनमा अगाडि बढ्न प्रेरित गरिएको छ। त्यस्तै ‘एक्लो जीवन’ र ‘विस्तारै’ प्रेम भावका गीत हुन्। ‘पैसा’ मा भने जीवनमा पैसाको महत्व, पैसा र पैसाको शक्तिले मानिसले कसरी रंग फेर्छ भन्ने अथ्र्याइएको छ।

व्याण्डमा सन्दिप विश्वकर्मा (भोकलिष्ट), राजीव खड्का र निखिल सिकर्मी (गितार), सजिन महर्जन(बेशिष्ट) र अमूल्य श्रेष्ठ (ड्रम) छन्। यो व्याण्डले यसै वर्ष नेपाल, भारत र अष्ट्रेलियाको टुर गर्दैछ । नेपालमा यसले आगामी बिहीबार पोखराको किङ्स लाउन्ज, शुक्रबार चितवन गार्डेन रिसोर्ट र शनिबार द कन्सेप्टमा कन्सर्ट गर्दैछ।

पीभीई नेटवर्कका विकेश कायस्थको नेतृत्वमा रहेको टिमले एक्सिसको कन्सर्टको व्यवस्थापन गर्नेछ।

सन् २००३ मा स्थापना भएको एक्सिसनले सन् २००४ मा ‘ब्ल्याक एण्ड ह्वाइट’ नामक एल्बम बजारमा ल्याएको थियो। यसपछि व्याण्डले सन् २००९ मा दोस्रो एलबम ‘माफ गर’ र सन् २०१७ मा ‘घर गाउँ’ नामक एल्बम सार्वजनिक गरेको थियो। एक्सिस विशेषत युवापुस्तामाझ रुचाइएको व्याण्डमा पर्दछ।