काठमाडौं । इजरायल र हमासबीचको रक्तपातपूर्ण द्वन्द्वका बीच प्यालेस्टाइनका राष्ट्रपति महमुद अब्बासले रुसको भ्रमण गर्ने भएका छन् । उनको भ्रमणलाई लिएर दुवै पक्षबाट पहल भइरहेको छ ।

रोयटर्स समाचार संस्थाले रुसको आरबीसी समाचारलाई उद्धृत गर्दै यो जानकारी दिएको हो ।

प्यालेस्टिनी नेतृत्व दुई भागमा विभाजित छ। एउटा प्यालेस्टिनी प्राधिकरण (पीए) हो जसको नेतृत्व राष्ट्रपति महमूद अब्बासले गर्छन्। पीएले वेस्ट बैंकका केही भागहरू नियन्त्रण गर्दछ। अर्को एउटा हमास अतिवादी समूह हो जसको गाजामा नियन्त्रण छ।

रुसका लागि प्यालेस्टिनी राजदूत अब्देल हाफेजले भने, “राष्ट्रपति अब्बास मस्को आउने सहमति भएको छ। हामी यो भ्रमण कहिले हुने भन्ने बारे क्रेमलिनको आधिकारिक बयानको पर्खाइमा छौं।”

शनिबार हमासले इजरायलमा आक्रमण गरेको थियो । इजरायलको प्रतिकार जारी छ। यस द्वन्द्वमा गाजामा हालसम्म ७०० जनाको मृत्यु भइसकेको छ । र ९०० इजरायली मारिएका छन्।

इजरायल र हमासबीचको द्वन्द्वमा रुसले पश्चिमी देशहरूभन्दा पूर्णतया फरक प्रतिक्रिया दिएको छ। रुसले गाजा र इजरायलमा भइरहेको हिंसाको निन्दा गर्दै अमेरिकाको प्रतिक्रिया ‘विपत्तिजनक’ भएको बताएको छ ।

रुसले हमासको प्रत्यक्ष निन्दा गरेको छैन।

यस विषयमा अमेरिकाको दृष्टिकोणप्रति रुसले आपत्ति जनाएको छ । रुसले स्वतन्त्र प्यालेस्टाइन राज्यको आवश्यकतालाई बेवास्ता गर्दै अमेरिकी प्रतिक्रिया विनाशकारी भएको बताएको छ।