काठमाडौं । इजरायलका प्रधानमन्त्री बेन्जामिन नेतन्याहुले अमेरिकी राष्ट्रपति जो बाइडेनलाई हमासको आक्रमणबारे जानकारी दिँदै प्यालेस्टाइनी चरमपन्थी संगठनलाई आईएसआईएस (इस्लामिक स्टेट) भन्दा पनि खराब भएको बताएका छन्।

इजरायलले यो फोन कलको भिडियो सार्वजनिक गरेको छ । द्वन्द्व सुरु भएयता दुई नेताबीच तेस्रो पटक फोनमा कुराकानी भएको हो ।

नेतान्याहुले अमेरिकी राष्ट्रपति बाइडेनलाई भने, “जो (बाइडेन), म तपाईलाई हामीले सामना गरिरहेको कठिन परिस्थितिको वास्तविक चित्र प्रस्तुत गर्न चाहन्छु।”

उनले भने, “हामीलाई शनिबार हमला गरिएको थियो र म भन्न सक्छु कि हामीले प्रलय पछि यस्तो केहि देखेका छैनौं।”

नेतान्याहुले भने, “सयौं मानिसहरू मारिए। परिवारहरू घरमा सुतिरहेको बेला मारिए। महिलाहरूलाई बलात्कार र हत्या गरियो। सयभन्दा बढी मानिसहरूलाई अपहरण गरियो। जसमा बालबालिकाहरू पनि पर्छन्।”

उनले बाइडेनलाई भने, “हामीले पछिल्लो पटक कुरा गरेदेखि यो बर्बरता झन् झन् बढेको छ। उनीहरूले सिपाहीहरूको घाँटी काटे। उनीहरूले सबैलाई मार्ने निर्णय गरेका थिए।”

उनले भने, “हामीले देशको इतिहासमा यस्तो कहिल्यै देखेका छैनौं। तिनीहरू आइएसआइएस भन्दा पनि खराब छन्। हामीले उनीहरूलाई त्यस्तै व्यवहार गर्नुपर्छ।”

हमासले शनिबार इजरायलमा सयौं रकेट प्रहार गरेको थियो । हमासका लडाकुहरूले इजरायली सीमामा प्रवेश गरी धेरै मानिसहरूलाई बन्धक बनाएका थिए। इजरायलले बन्धक बनाइएका व्यक्तिको संख्या १०० देखि १५० बीचमा रहेको बताएको छ।

हमासको आक्रमणमा मारिने इजरायलीको संख्या १२ सय पुगेको छ । इजरायलका प्रधानमन्त्रीले अमेरिकी राष्ट्रपति जो बाइडेनलाई इजरायललाई सहयोग गरेकोमा धन्यवाद दिएका छन् ।

नेतान्याहुले भने, “राष्ट्रपति जो (बाइडेन), म तपाईलाई र तपाईको सम्पूर्ण प्रशासनलाई तपाईले हामीलाई निरन्तर सहयोग गरेकोमा धन्यवाद दिन चाहन्छु।”