काठमाडौं । इराकको राजधानी बगदादमा हजारौं इराकीहरू गाजाका प्यालेस्टिनीहरूको समर्थनमा भेला भएका छन्।

अमेरिकी विदेशमन्त्री एन्टोनी ब्लिन्केनले शुक्रबार जोर्डनका राजा अब्दुल्लालाई भेटेका थिए भने अर्कोतर्फ शुक्रबारको नमाजपछि गाजाका जनताको समर्थनमा ठूलो जुलुस निकालिएको थियो ।

जेरुसेलममा बीबीसीका मध्यपूर्व संवाददाता योलान्डे नेलका अनुसार जोर्डनमा वेस्ट बैंकको सीमा नजिकै ठूलो सङ्ख्यामा भेला भएका प्रदर्शनकारी र सुरक्षा बलहरूबीच झडप भएको थियो।

इजरायलले किंग हुसेन क्रसिङ नियन्त्रण गर्दछ र प्यालेस्टाइनतर्फको यो प्रवेशद्वार बन्द राखिएको थियो।

बग्दादका एक आयोजक अबु कयानलाई उद्धृत गर्दै समाचार एजेन्सी एएफपीले भन्यो, “अधिग्रहित प्यालेस्टाइनमा जे भइरहेको छ त्यसको निन्दा गर्न यहाँ र्‍याली निकालिएको छ।”

आज शुक्रबारको नमाजपछि पश्चिम एसियाभरका देशहरूमा आयोजना गरिएका धेरै र्‍यालीहरूमध्ये यो एउटा हो।

हमास र हिजबुल्लाहका वरिष्ठ नेताहरूको आह्वानमा यी प्रदर्शनहरू आयोजना गरिएको हो।

हमासका पूर्व नेता खालेद मेसलले हिजो अरब र इस्लामिक संसारका जनतालाई र्‍यालीका लागि चोकमा जान अपिल गरेका थिए।

लेबनान, ट्युनिसिया र जोर्डनमा यस्ता प्रदर्शनहरू भइरहेका छन्।

कब्जा गरिएको पूर्वी जेरुसेलमको अल-अक्सा मस्जिदमा अशान्तिको सम्भावनालाई ध्यानमा राखेर सुरक्षा व्यवस्था कडा पारिएको छ।