काठमाडौं । ताइवानमा राष्ट्रपतीय निर्वाचन हुनुअघि कथित चिनियाँ जासुसका बारेमा धेरै चर्चा भइरहेको छ ।

सन् १९४९ देखि ताइवान र चीनले एकअर्काको जासुसी गर्दै आएका छन् । ताइवानले विगत १० महिनामा चीनको जासुसीमा उल्लेख्य वृद्धि भएको आरोप लगाएको छ ।

हालै चीनका लागि जासुसी गरेको अभियोगमा वायुसेनाका पूर्व कर्णेल लिउ शेङ शूलाई २० वर्षको जेल सजाय सुनाइएको थियो ।

यस वर्षको सुरुदेखि ताइवानमा कम्तीमा १६ जनालाई चीनका लागि जासुसी गरेको आरोप लगाइएको छ।

२०१३ र २०१९ बीच ताइवानमा जासुसीका ४४ घटनाहरू रिपोर्ट गरिएका छन्।

यो सबै यस्तो समयमा भइरहेको छ जब चीनले सैन्य र राजनीतिक दबाबमा ताइवानमाथि आफ्नो सार्वभौमसत्ताको दाबी बढाइरहेको छ।

यस क्षेत्रमा दशकौं बिताएका एक सेवानिवृत्त अमेरिकी कर्णेल भन्छन् कि ताइवान चिनियाँ जासूसहरूको लागि सजिलो लक्ष्य हो।

उनी भन्छन्, “चीनसँग निकटता र समान भाषाका कारण जासुसी गर्न सजिलो छ र ताइवानले जासुसलाई धेरै कठोर सजाय दिँदैन।”

ताइवानको राष्ट्रिय सुरक्षा ब्यूरोका महानिर्देशक साई मिङ येनले गत हप्ता भनेका थिए कि चीनले लामो समयदेखि ताइवानको विरुद्धमा गोली नचलाइ युद्ध लडेको छ।

जासुसी बाहेक ताइवान सरकारले चुनावमा चीनले साइबर हमला गरेको आरोप पनि लगाएको छ ।

मिङ येनले जनवरी २०२४ मा हुने राष्ट्रपतीय निर्वाचनअघि यस्ता जासुसी र साइबर हमलाहरू बढ्ने विश्वास राख्छन्।

जुलाईमा एक व्यक्तिलाई चीनका लागि जासुसी गरेको आरोप लागेको थियो । उक्त व्यक्तिले सैनिक अड्डा नजिकका पसलहरूको सहयोगमा सैनिकहरूसँग मित्रता गरेको र उनीहरूबाट गुप्तचर सूचना प्राप्त गरेको आरोप छ।

यस बाहेक ताइवानी व्यवसायीमाथि छानबिन गरेपछि जासुसीका धेरै नयाँ केसहरू बाहिर आएका छन् ।

विज्ञहरू भन्छन् कि चिनियाँ जासुसहरूले गुप्तचर सूचना मात्रै सङ्कलन गर्दैनन्, तर तिनीहरूले चीनको पक्षमा जनमतलाई प्रभाव पार्ने काम पनि गरिरहेका छन्।