काठमाडौं। गाजामा युद्ध विरामको माग गर्दै बेलायतको राजधानी लण्डनको मध्यभागमा विशाल प्रदर्शन गरिएको छ। प्यालेस्टाइन समर्थकहरुले आयोजना गरेको प्रदर्शन इजराइल गाजा युद्ध शुरु भएयताकै सबैभन्दा ठूलो प्रदर्शन भएको प्रहरीले जनाएको छ।

प्रहरीका अनुसार प्रदर्शनमा झण्डै ३ लाख जना सहभागी थिए। प्रदर्शनमा सहभागी मध्ये १ सयजनाभन्दा बढी पक्राउ परेका छन्। अधिकारीहरुले प्रदर्शनकारीहरुको अराजकताको सामना गर्नुपरेको समेत बताएका छन्। प्रदर्शनमा केही अति दक्षिणपन्थीहरु समेत सहभागी भएको बताइएको छ।

प्रदर्शनकारीहरुले प्रहरी अधिकारीहरुलाई हप्काइरहेको र उनीहरु विरुद्ध नै नाराबाजी गरेको दृश्यहरु समेत सार्वजनिक भएका छन्। बेलायती प्रधानमन्त्री ऋषि सुनकले अपराधिकताले सशस्त्र बलको अनादर गर्ने बताए। प्रदर्शनकारीहरु प्रहरी माथि नै जाइ लागेको भन्दै उनीहरुको निन्दा समेत गरे।