काठमाडौं । युरोपेली देश स्वीडेन र डेनमार्कमा कुरान जलाउने घटना बाहिर आएपछि मुस्लिम देशहरु आक्रोशित भएका थिए । यसैबीच, मंगलबार डेनमार्कको संसदले कुरानको अपमानलाई प्रतिबन्ध लगाउने विधेयकमाथि छलफल गर्यो।

डेनमार्क सरकारले यस्तो तनाव राष्ट्रिय सुरक्षाका लागि खतरा भएको बताएको छ। त्यसैले सार्वजनिक रुपमा कुनै धार्मिक ग्रन्थ जलाउने वा अपमान गर्ने घटनालाई अपराध बनाउने प्रस्ताव गरिएको छ ।

डेनमार्कको संसदको वेबसाइटका अनुसार यस कानून अन्तर्गत कुरान जलाउने वा अपमान गर्ने जस्ता अपराध गर्नेलाई दुई वर्षसम्म जेल सजाय हुन सक्छ।

डेनमार्कको राष्ट्रिय प्रहरीको तथ्याङ्कअनुसार यस वर्षको जुलाई २१ देखि अक्टोबर २४ सम्म डेनमार्कमा धार्मिक पुस्तक वा झण्डा जलाउने ४८३ घटना दर्ता भएका छन् ।

वास्तवमा, डेनमार्कका अति दक्षिणपन्थी नेताले स्वीडेनको राजधानी स्टकहोममा रहेको टर्की दूतावास अगाडि कुरानको प्रतिलिपि च्यातेर आगो लगाएका थिए। त्यसपछि साउदी अरेबिया, युएई, पाकिस्तान र इजिप्टलगायत लगभग सबै मुस्लिम देशहरूले यसको कडा निन्दा गरे। मुस्लिम देशहरूले स्वीडेन र डेनमार्कलाई यस्ता घटना रोक्न कडा कदम चाल्न आग्रह गरेका थिए।

साउदी अरेबियाले डेनिस कूटनीतिज्ञलाई समेत बोलाएको थियो। वरिष्ठ मौलवी नेता मुक्तादा सदरको आह्वान पछि, जुलाई २०२३ मा, करिब एक हजार प्रदर्शनकारीहरूले बगदादको ग्रीन जोनमा रहेको डेनिस दूतावासतिर मार्च गर्ने प्रयास गरे।

डेनिस संसदको वेबसाइटका अनुसार यो विधेयकले कुनै पनि धार्मिक समुदायको विशेष धार्मिक महत्त्वको कुनै पनि पाठको जानाजानी र अनुचित सार्वजनिक अपमानलाई अपराधीकरण गर्ने प्रस्ताव गरेको छ। यस विधेयकमा यस्ता अपराध गर्नेलाई दुई वर्षसम्म जेल सजाय हुनसक्ने व्यवस्था छ ।

यो कानून डेनिस दण्ड संहिताको अध्याय १२ मा समावेश हुनेछ। अध्याय १२ डेनमार्कको राष्ट्रिय सुरक्षासँग सम्बन्धित कानून हो। मंगलबार भएको छलफलपछि समितिले विधेयकको अध्ययन गर्नेछ । यसपछि संसदमा मतदानअघि पनि दुईपटक छलफल हुनेछ ।

यसअघि अगस्टमा पनि यस्तो विधेयक ल्याउने प्रयास भएको थियो तर चर्को आलोचनापछि संशोधन गरिएको थियो । अगस्टमा भनिएको थियो कि यो विधेयकले अभिव्यक्ति स्वतन्त्रतालाई सीमित गर्दछ र त्यसैले यसलाई कार्यान्वयन गर्न गाह्रो हुनेछ।