काठमाडौं । विश्वकप २०२३ मा भारतको पराजयपछि प्रधानमन्त्री नरेन्द्र मोदीले ट्विट गर्दै टोलीलाई हौसला दिएका छन् ।

उनले ट्विट गर्दै विश्वकपमा टीम इन्डियाको प्रतिभा र दृढ संकल्प उल्लेखनीय रहेको लेखेका छन् ।

पीएम मोदीले लेखेका छन्, “तपाईंले ठूलो भावनाका साथ खेल्नुभयो र देशलाई गौरवान्वित गर्नुभयो। हामी आज पनि तपाईंको साथमा छौं र भविष्यमा पनि तपाईंसँगै उभिनेछौं।”

ट्राभिस हेड र मार्नुस लाबुस्चेनको बलियो इनिङ्सको मद्दतले अस्ट्रेलियाले भारतलाई ६ विकेटले हराउँदै छैटौं पटक एकदिवसीय विश्वकपको उपाधि जितेको छ ।

अष्ट्रेलियाको इनिङ्सको सुरुवात राम्रो भएन र यसका तीन ब्याट्सम्यान ४७ रनमा मात्रै आउट भएपनि यसपछि ट्राभिस हेड र मार्नुस लाबुस्चेनले चौथो विकेटका लागि शतकीय साझेदारी गर्दै टोलीलाई जितको उचाइमा पुर्याएका थिए ।

यसअघि विराट कोहली र केएल राहुलको अर्धशतकको मद्दतले भारतले अस्ट्रेलियालाई २०२३ को विश्वकप जित्न २४१ रनको लक्ष्य दिएको थियो।

प्याट कमिन्सले टस जितेर भारतलाई पहिले ब्याटिङको निम्तो दिएपछि रोहित शर्माले आफू पनि पहिले ब्याटिङ गर्न चाहेको बताए । रोहितको नेतृत्वमा टोलीले बलियो सुरुवात गरे पनि ठूलो स्कोर बनाउन सकेन ।

रोहित शर्मा र शुभमन गिलले भारतीय इनिङ्सको सुरुवात सावधानीपूर्वक गरेका थिए । यस क्रममा शुभमन गिलले एकपटक लाइफलाइन पनि पाए तर उनले चार रन मात्र बनाउन सके । गिल पाँचौं ओभरको दोस्रो बलमा एडम जाम्पाको हातबाट मिचेल स्टार्कले क्याच आउट गराए।

रोहितले सुरुदेखि नै विस्फोटक ब्याटिङ गर्दै आएका थिए । उनले जोस हेजलउडको पहिलो दुई ओभरमा चार चौका र मिचेल स्टार्कलाई छक्का प्रहार गरे।

सातौं ओभरमा रोहितले स्टार्कको लगातार तीन बलमा चौका प्रहार गर्दै भारतको स्कोर ५० रनभन्दा माथि पुर्याए ।