काठमाडौं । पाकिस्तानको कराँची सहरको एक सपिङ मलमा भएको आगलागीमा परी कम्तीमा आठ जनाको मृत्यु भएको पुष्टि भएको छ ।

कराचीका मेयर मुर्तजा वहाब सिद्दीकीले सोसल मिडिया साइट एक्समा पोस्टमा आगलागीको जानकारी दिएका छन्।

कराँचीको जिन्नाह अस्पतालका प्रवक्ता जहाँगीर इजाजले बीबीसीलाई भने कि अस्पतालमा आठ जनालाई ल्याइएको थियो जसको पहिले नै मृत्यु भइसकेको थियो।

तीन जना घाइते र खतरामुक्त रहेको पनि उनले बताए ।

अस्पतालको रेकर्ड अनुसार आरजे मलमा आगलागीपछि उद्धार कार्यमा पहिलो शव पाकिस्तानी समय अनुसार बिहान ८.३९ बजे अस्पताल ल्याइएको थियो ।

अभिलेख अनुसार आगलागीमा परी मृत्यु हुने र घाइते हुनेहरुको उमेर २२ देखि ४३ वर्षसम्म रहेको छ ।