काठमाडौं । रुसी राष्ट्रपति भ्लादिमिर पुटिनका आलोचक तथा विपक्षी नेता एलेक्सी नभाल्नी बेपत्ता भएको खबर छ । एलेक्सीका प्रवक्ताका अनुसार उनका वकिलहरूले झण्डै एक सातादेखि उनको कुरा सुनेका छैनन् र कैदीहरूको सूचीमा पनि उनको नाम हराइरहेको छ।

मस्कोमा थुनामा रहेका एलेक्सीलाई चरमपन्थी समुदायको निर्माण र पालनपोषणलगायतका अपराधमा दोषी पाइएपछि यस वर्षको अगस्टमा १९ वर्षको जेल सजाय सुनाइएको थियो।

नभाल्नीका प्रवक्ता किरा यार्मिशले सोमबार बारम्बार प्रयासको बाबजुद पनि वकिलहरूले जेलमा रहेका नेतालाई भेट्न नसकेको र उनी जेलमा नभएको जानकारी दिइएको आरोप लगाए ।

उनले सामाजिक सञ्जालमा आरोप लगाएअनुसार वकिलहरूले आइके-६ र आइके-७ भ्रमण गर्ने प्रयास गरे जहाँ उनी पहिले कैद थिए । तर उनीहरूलाई नभाल्नी अब त्यहाँ छैनन् भनियो । उनीहरूलाई नभाल्नी त्यतिबेला कहाँ छन् भन्ने पनि थाहा थिएन ।

यार्मिशले नभाल्नी विगत ६ दिनदेखि बेपत्ता रहेको बताए । उनलाई कहाँ सरुवा गरिएको हो भन्ने प्रशासनले समेत नखुलाएको उनले बताए । यसैबीच, मस्को टाइम्सले नाभाल्नीको टोलीलाई उद्धृत गर्दै जेलमा रहेका रुसी नेताको स्वास्थ्यमा गम्भीर समस्या भएको जनाएको छ।

अलेक्सी नाभाल्नी पहिले नै ठगी र अन्य आरोपहरूमा ११.५ वर्षको सजाय भोग्दै थिए, जुन उनले निराधार भनेका थिए। उनी पछिल्लो पटक आइके–६ पेनल कालोनीमा थुनिएका थिए । नाभाल्नीका समर्थकहरूले उनको गिरफ्तारी र सजाय पुटिनको आलोचनालाई दबाउनको लागि “राजनीतिक रूपमा प्रेरित” प्रयास भएको आरोप लगाएका छन्।

जनवरी २०२१ मा रूस फर्केपछि, नाभाल्नीलाई २०१३ मा उनको विरुद्धमा ल्याइएका ठगी मुद्दामा तुरुन्तै जेल पठाइयो, जसलाई उनले राजनीतिक रूपमा प्रेरित भनी खारेज गरे। उनले युक्रेन विरुद्ध रसियाको युद्धको विरुद्ध जेलबाट अभियान पनि चलाए र युद्धको सार्वजनिक विरोधलाई व्यवस्थित गर्ने प्रयास गरे।

सन् २०१७ मा नाभाल्नीमाथि घातक हमला भएको थियो। आक्रमणमा उनको आँखामा गम्भीर चोट लागेको थियो । २०१८ मा, उनले राष्ट्रपति चुनावमा उठ्ने प्रयास गरे तर धोखाधडीको आरोपका कारण त्यसो गर्न सकेनन्। एलेक्सीले यसलाई सरकारको षड्यन्त्र भनेका छन् । जुलाई २०१९ मा, उनी ३० दिनको लागि जेलमा परे किनभने उनले ठूलो विरोधको घोषणा गरेका थिए। त्यतिबेला जेलमा उनको स्वास्थ्य बिग्रिएपछि जेलमा विष खुवाउने प्रयास भएको पनि बताइएको छ ।

सन् २०२० मा एलेक्सीलाई विष खुवाएर मार्ने प्रयास भएको थियो । विमानमा उनी बेहोस अवस्थामा भेटिएपछि आकस्मिक अवतरण गराएर अस्पताल भर्ना गरिएको थियो । उनी धेरै दिन कोमामा पनि रहे ।