काठमाडौं । भनिन्छ भगवानले दिए भने अपत्यारिलो किसिमले दिन्छन् । भर्जिनियाकी एक महिलासँग पनि यस्तै भएको छ । जेनेट बेन नामकी महिलाले एउटा सानो जनरल स्टोरबाट पिउनको लागि सोडाको बोतल किनिन्। सोडा पिउँदै उभिएको बेला उनले पसलमा राखिएको स्क्र्याच अफ लटरी टिकट देखेपछि किनिन्।

पछि, जब उनले आफ्नो टिकटले १ लाख डलर पुरस्कार जितेको थाहा पाइन्, उनी छक्क परिन्। बेनले भर्जिनिया लटरी अधिकारीहरूलाई बताएअनुसार उनी सोडा लिन मात्र रोकिएकी थिइन् र उनको भाग्यले उनको आँखा लटरी टिकटमा पर्यो ।

बेनले सम्झिइन्, ‘विजेता टिकट नम्बर देखेर म छक्क र अचम्ममा परें। मैले यसलाई राम्ररी देख्न सकिनँ भन्ने लाग्यो।’ उनले भनिन्– यो जितको खुसी मनाउनका लागि ठूलो योजना छ । म यो वर्ष एक अद्भुत क्रिसमस मनाउन जाँदैछु।’

संयोग र भाग्यले पैसा जितेको यो पहिलो घटना होइन । यसअघि पनि यस्ता घटना भइरहेका छन् । हालै अमेरिकाको अर्कान्सास निवासी ग्यारी लेसी चुरोट किन्न गएका थिए । त्यसपछि उनको दिमागमा पावरबल लटरी टिकट किन्ने विचार आयो। टिकट किनेपछि उनले स्क्र्याच गर्दा ५० हजार डलर जितेको थाहा भयो।