काठमाडौं । पाकिस्तानका पूर्वप्रधानमन्त्री इमरान खानलाई ठूलो झट्का लागेको छ । उच्च अदालतले तोषाखाना मुद्दामा ट्रायल कोर्टको फैसला बदर गर्न माग गर्दै गरेको निवेदन बिहीबार खारेज गरेको छ । यसपछि उनले अब फेब्रुअरी ८ मा हुने आमनिर्वाचनमा भाग लिन पाउने छैनन् ।

वास्तवमा, अगस्ट ५ मा ७१ वर्षीय पूर्व क्रिकेटरबाट राजनीतिज्ञ बनेका इमरान खानलाई इस्लामाबादको ट्रायल कोर्टले तोशाखाना मुद्दामा दोषी ठहर गरेको थियो। यससँगै पाकिस्तान तहरीक–ए–इन्साफ (पीटीआई) पार्टीका संस्थापक अध्यक्षलाई पाँच वर्षका लागि चुनाव लड्न अयोग्य घोषित गरिएको छ ।

इमरान खानले आफ्नो सजायलाई इस्लामाबाद उच्च अदालतमा चुनौती दिएका थिए । अगस्ट २८ मा अदालतले उनलाई तीन वर्षको जेल सजाय खारेज गर्दै धरौटीमा राखेर राहत दिएको थियो । तर, उनको अभियोग हालसम्म खारेज भएको छैन, जसले गर्दा उनी कुनै पनि सार्वजनिक पदमा बस्न अयोग्य भएका छन् ।

यसपछि पूर्वप्रधानमन्त्रीले उक्त मुद्दामा ट्रायल कोर्टको फैसला निलम्बन गर्न माग गर्दै उच्च अदालतमा निवेदन दिएका थिए । बिहीबार, इस्लामाबाद उच्च अदालतले तोशाखाना मामिलामा ट्रायल कोर्टको फैसला निलम्बन गर्न माग गरिएको उनको निवेदन खारेज गर्‍यो।

विस्तृत नौ पृष्ठको फैसलामा, आईएचसीका मुख्य न्यायाधीश अमिर फारुक र न्यायमूर्ति तारिक महमोर जहाँगिरीले तत्काल आवेदनलाई विचारणीय मान्न नसकिने निर्णय गरे र सोही अनुसार खारेज गरियो। “अपीलकर्ताले दायर गरेको निलम्बनको निवेदन पढ्दा सजाय निलम्बनका लागि मात्रै भएको देखाउँछ,” फैसलामा भनिएको छ ।