काठमाडौं । पाकिस्तानमा फेब्रुअरी ८ मा हुन लागेको निर्वाचन अब स्थगित हुन सक्नेछ । शुक्रबार संसदको माथिल्लो सदनले सुरक्षाका कारण निर्वाचन ढिलाइ गर्न माग गर्दै प्रस्ताव पारित गरेको हो ।

यो प्रस्ताव पाकिस्तानको सिनेटले सर्वसम्मतिले पारित गरेको हो । तर, अन्तरिम कार्यवाहक सूचना मन्त्री मुर्तजा सोलाङ्गी र पीएमएल-एन सिनेटर अफनानुल्लाह खानले प्रस्तावको विरोध गरेका थिए।

वास्तवमा, सिनेटर दिलावर खानले संसदको माथिल्लो सदनमा चुनाव ढिलाइको माग गर्दै प्रस्ताव प्रस्तुत गरे जुन बहुमत सांसदहरूले अनुमोदन गरे। यो प्रस्ताव स्वतन्त्र सिनेटर दिलावर खानले मात्र १४ सांसदको उपस्थितिमा बैठकमा प्रस्तुत गरेका थिए । संसदको माथिल्लो सदनमा जम्मा एक सय सदस्य छन् ।

कानून र व्यवस्थाको स्थितिमा प्रकाश पार्दै, दिलावर खानले भने ‘मोहसिन दावर र जमियत उलेमा-ए-इस्लाम फजलका सदस्यहरूमाथि हमला गरिएको थियो। बलुचिस्तान र खैबर पख्तुनख्वामा समेत सुरक्षा बलमाथि आक्रमण भएको थियो । एएनपीका नेता आइमल वलीको पनि निर्वाचनप्रति आपत्ति छ ।’

सिनेटरले चुनावी र्‍यालीमा खुफिया एजेन्सीहरूबाट पनि खतराको चेतावनी जारी गरेको बताए। सिनेटले अवरोध नहटाइ निर्वाचन गर्न नहुने भएकाले फेब्रुअरी ८ मा हुने निर्वाचन स्थगित गर्नुपर्ने बताएको छ । उनले भने ‘पाकिस्तानको निर्वाचन आयोगले निर्वाचन स्थगित गर्ने प्रक्रिया सुरु गर्नुपर्छ। सिनेटलाई निर्वाचन आयोगमा विश्वास छ।’

पाकिस्तान मुस्लिम लिग-नवाज (पीएमएल-एन) का सिनेटर अफनानुल्लाह खानले यस प्रस्तावको विरोध गर्दै भने ‘२००८ र २०१३ को आम चुनावमा देशको सुरक्षा स्थिति खराब थियो। सुरक्षालाई बहाना बनाएर चुनाव हुँदैन । के युनाइटेड किंगडम र संयुक्त राज्य अमेरिकाले दोस्रो विश्वयुद्धको समयमा चुनाव स्थगित गरे ? मौसमका आधारमा बहाना पनि बनाइन्छ ।’