काठमाडौं । इजरायली प्रहरीले रानाना सहरमा भएको कार आक्रमणमा कम्तीमा १८ जना घाइते भएको जनाएको छ ।

यद्यपि स्थानीय सञ्चारमाध्यमले घाइतेमध्ये एक महिलाको मृत्यु भएको दाबी गरेका छन् । रिपोर्टहरूका अनुसार स्वास्थ्य अधिकारीहरूले भनेका छन् ‘गम्भीर घाइते महिलालाई अस्पताल ल्याइएको थियो तर उनको जीवन बचाउन सकिएन।’

पीडितलाई कारले ठक्कर दिएर धारिलो हतियारले आक्रमण गरेको प्रहरीले जनाएको छ ।

अधिकारीहरुका अनुसार यो हमलाको आरोपमा हेब्रोनबाट एक प्यालेस्टिनी नागरिकलाई पक्राउ गरिएको छ । अर्को सम्भावित आक्रमणकारी फेला पार्न यस क्षेत्रमा खोजी भइरहेको छ।

प्रहरीका अनुसार संदिग्धहरूले आक्रमणका लागि तीनवटा कार चोरेका थिए। गाजामा इजरायलको सैन्य कारबाही भइरहेका बेला यो हमला भएको हो ।

हमासद्वारा सञ्चालित गाजाको स्वास्थ्य मन्त्रालयले अक्टोबर ७ यता इजरायली आक्रमणमा हालसम्म २४ हजार प्यालेस्टाइनीको मृत्यु भएको जनाएको छ ।