काठमाडौं । मुम्बई एयरपोर्टको रनवेमा यात्रुले खाना खाएको भिडियो भाइरल भएपछि एयरलाइन्स कम्पनी इन्डिगो र मुम्बई एयरपोर्टलाई भारी जरिवाना लगाइएको छ ।

उड्डयन नियामक ‘ब्यूरो अफ सिभिल एभिएसन सेक्युरिटी’ (बीसीएएस) ले इन्डिगोलाई १ करोड २० लाख रुपैयाँ जरिवाना लगाएको छ ।

मुम्बई एयरपोर्टको व्यवस्थापन गर्ने एमआईएएललाई कुल ९० लाख रुपैयाँ जरिवाना गरिएको छ। जसमध्ये बीसीएएसले ६० लाख रुपैयाँ जरिवाना लगाएको छ भने डीजीसीएले ३० लाख रुपैयाँ जरिवाना गरेको छ ।

अर्कोतर्फ, नागरिक उड्डयन महानिर्देशनालय (डीजीसीए) ले रोस्टरिङमा अनियमितता गरेको आरोपमा एयर इन्डिया र स्पाइसजेटलाई ३० लाख रुपैयाँ जरिवाना लगाएको छ।

यो हप्ता सामाजिक सञ्जालमा एक भिडियो क्लिप भाइरल भयो जसमा केही यात्रुहरू धावनमार्गमा बसेको देखिएका थिए। तीमध्ये केही मानिस खाना खाँदै गरेको पनि देखिएका छन् ।

समाचार एजेन्सी एएनआईले मंगलबार रिपोर्ट गरेअनुसार भिडियो भाइरल भएपछि केन्द्रीय नागरिक उड्डयन मन्त्री ज्योतिरादित्य सिन्धियाले सोमबार राति मन्त्रालयका सबै अधिकारीहरूसँग बैठक गरे।

मंगलबार इन्डिगो र मुम्बई एयरपोर्टलाई कारण देखाउ नोटिस जारी गरिएको थियो। तोकिएको समयभित्र जवाफ नदिए कारबाही हुने र आर्थिक जरिवाना समेत हुने समेत जानकारी गराइएको थियो ।

आइतबार गोवा-दिल्ली उडान ढिलो भएपछि, यसलाई मुम्बई एयरपोर्टमा डाइभर्ट गरिएको थियो। तर धेरै यात्रु विमानबाट बाहिर आएर रनवेमा बसे र कतिपयले त्यहीँ खाना पनि खाए ।

यो उडान आइतबार गोवाबाट उडेको थियो तर बाक्लो कुहिरोका कारण दिल्लीमा अवतरण हुन सकेन। त्यसैले विमानलाई मुम्बईतर्फ मोडियो।