काठमाडौं । चलचित्र अन्नपूर्णिको विवाद र यसलाई नेटफ्लिक्सबाट हटाइएपछि चलचित्रकी नायिका नयनताराले चलचित्र र जनताको आपत्तिलाई लिएर प्रतिक्रिया दिएकी छन् ।

उनले अन्नपूर्णी चलचित्र मार्फत जनतालाई सकारात्मक सन्देश दिन चाहेको बताउँदै जनतालाई प्रेरणा दिन यो चलचित्र बनाएको र कसैको भावनामा चोट पुर्‍याउने आफ्नो नियत नभएको बताइन् ।

बिहीबार, उनले इन्स्टाग्राममा लेखिन्: “हामीले सकारात्मक सन्देश दिने इमानदार प्रयास गरिरहेका थियौं, जसले अनजानमा मानिसहरूको भावनामा चोट पुर्यायो। सेन्सर बोर्डबाट पारित भई हलमा रिलिज भएको फिल्मलाई ओटीटीबाट हटाइनेछ भन्ने हामीले आशा गरेका थिएनौं।”

“म र मेरो टोली कसैको भावनामा चोट पुर्‍याउन चाहँदैनौं र हामीले यस विषयको गम्भीरतालाई बुझेका छौं। म आफैं पनि भगवानमा विश्वास गर्छु र बारम्बार मन्दिर जान्छु, त्यसैले म जनताको भावनामा चोट पुर्‍याउने सोच्न पनि सक्दिन। हाम्रो फिल्मबाट जो कोहीलाई चोट पुगेको छ, म माफी चाहन्छु।”

नयनतारा तमिल फिल्म ‘अन्नपूर्णीः द गडेस अफ फुड’ मा मुख्य भूमिकामा छिन् । फिल्म एक कट्टरपन्थी हिन्दू ब्राह्मण परिवारकी केटीको कथा हो जसले कठिनाइहरूको सामना गर्दै शेफ बन्ने सपना देख्छिन्।

यो फिल्म १ डिसेम्बरमा थिएटरहरूमा रिलिज भएको थियो र नेटफ्लिक्समा २९ डिसेम्बरमा रिलिज भएको थियो। तर ओटीटीमा आएपछि त्यसलाई लिएर विवाद सुरु भयो । यस फिल्मको बिरूद्ध एफआईआर दर्ता गरियो र त्यसपछि यसलाई नेटफ्लिक्सबाट हटाइयो।