काठमाडौं । गाजामा अझै पनि बन्धक बनाइएका केही इजरायलीका परिवारका सदस्यहरू सोमबार इजरायलको संसद, नेसेटमा प्रवेश गरे।

संसदमा आर्थिक मामिलासम्बन्धी बैठक चलिरहेको बेला बन्धकका परिवार सुरक्षा व्यवस्था तोडेर सदनभित्र पसेका थिए ।

ती मध्ये एकजनाले प्लेकार्ड बोकेका थिए जसमा लेखिएको थियो– ‘हाम्रा छोराछोरी मरिरहेका बेला तिमी यहाँ बस्न सक्दैनौ ।’

अक्टोबर ७ मा हमासको हमलापछि बन्धक बनाइएका १३० जना अझै हमासको हिरासतमा छन् भने गत वर्ष नोभेम्बरमा ‘अस्थायी युद्धविराम सम्झौता’ अन्तर्गत हमासले १०० जनालाई रिहा गरेको थियो।

समाचार एजेन्सी रोयटर्सका अनुसार इजरायल र हमासबीच अर्को सम्झौता गर्न अमेरिका, कतार र इजिप्ट सफल हुने देखिँदैन ।

इजरायलले हमासलाई पूर्ण रूपमा नष्ट नगरेसम्म युद्ध नरोक्ने बताएको छ । जबकी हमासले इजरायलले आफ्ना सबै प्यालेस्टिनी नागरिकलाई जेलबाट रिहा गर्न तयार भएपछि मात्र सम्झौतामा सहमत हुने जनाएको छ । हमासका धेरै नेताहरू पनि इजरायली जेलमा छन्।