काठमाडौं । अघिल्लो युद्धबिराम अन्त्य भएको दुई महिनापछि इजरायल फेरि युद्धविराम प्रस्तावमा अघि बढेको छ । इजरायलले हमास लडाकुहरूलाई प्रस्ताव पठाउँदै आफ्ना सबै बन्धकहरूलाई रिहा गरिएमा गाजामा दुई महिना युद्धविराम गर्न तयार रहेको बताएको छ।

इजरायल र हमासबीच अक्टोबर ७, २०२३ देखि युद्ध चलिरहेको छ । सबैभन्दा पहिले हमासका लडाकुहरू इजरायलमा प्रवेश गरे र आक्रमण गरे। यस घटनामा करिब १४०० इजरायली नागरिकको मृत्यु भएको थियो । जबकि २ सय ४० जना अपहरणमा परेका थिए ।

जवाफमा इजरायलले गाजामा आक्रमण गर्‍यो जसमा २५ हजार भन्दा बढी मानिस मारिए। करिब १३७ इजरायली नागरिक अझै पनि हमास लडाकुको हिरासतमा छन्। इजरायलका मानिसहरूले यी नागरिकहरूलाई मुक्त गर्न सरकारलाई दबाब दिइरहेका छन्।

समाचार एजेन्सी रोयटर्सले सोमबार अमेरिकी समाचार आउटलेट एक्सियोसलाई उद्धृत गर्दै दाबी गरेअनुसार इजरायलले हमासलाई प्रस्ताव दिएको छ । यो प्रस्ताव कतार र इजिप्टले मध्यस्थकर्ताको भूमिका खेल्दै पठाएको हो । यसमा बहु-चरणीय सम्झौता अन्तर्गत गाजामा दुई महिनाका लागि युद्धविराम घोषणा गर्ने सहमति भएको छ।

दुई इजरायली अधिकारीहरूलाई उद्धृत गर्दै रिपोर्टमा भनिएअनुसार यस प्रस्तावमा इजरायलले यी दुई महिनाको युद्धविरामको बदलामा हमासले सबै इजरायली बन्धकहरूलाई रिहा गर्नुपर्ने शर्त राखेको छ।

तर, अहिलेसम्म इजरायल, कतार वा इजिप्टले यसको पुष्टि गरेका छैनन् । यदि हमास लडाकुहरू पनि यो प्रस्तावमा सहमत भएमा गाजामा केही दिन रक्तपात हुने छैन।

शान्ति वार्ताको बारेमा यो रिपोर्ट अमेरिकी राष्ट्रपति जो बाइडेनका सल्लाहकार ब्रेट म्याकगुर्क आइतवार इजिप्टको भ्रमण गर्दा र कतार पुग्ने सम्भावना रहेको बेला आएको हो।

रिपोर्टका अनुसार इजरायली युद्ध मन्त्रिपरिषद्ले हालै प्यालेस्टिनी समर्थित समूह हमाससँग बन्धक सम्झौताको नयाँ प्रस्तावलाई अनुमोदन गरेको छ। यो प्रस्ताव हमासले अस्वीकृत गरेको सम्झौताको अघिल्लो पक्षभन्दा फरक रहेको बताइएको छ ।