काठमाडौं । गोपनीयता ऐन अन्तर्गत गठन गरिएको विशेष अदालतले मंगलबार पाकिस्तानका पूर्व प्रधानमन्त्री इमरान खान र पूर्व विदेशमन्त्री शाह महमूद कुरैशीलाई साइफर मुद्दामा १० वर्षको जेल सजाय सुनाएको छ।

उनको पार्टी पीटीआईले एक विज्ञप्तिमा भनेको छ, “पूर्व प्रधानमन्त्री इमरान खान र विदेश मन्त्री शाह महमूद कुरैशीलाई झुटो साइफर मुद्दामा १० वर्षको जेल सजाय सुनाइएको छ । यो मुद्दामा न त मिडियालाई पहुँच दिइएको छ न त यसको ट्रायल सार्वजनिक गरिएको छ।”

“कानूनी टोलीले निर्णयलाई उच्च अदालतमा चुनौती दिनेछ र आशा छ कि सजाय निलम्बन हुनेछ।” इमरान खानलाई यस्तो समयमा सजाय सुनाइएको छ जब पाकिस्तानमा आगामी दिनमा आम चुनाव हुन लागेको छ । मुलुकमा फेब्रुअरी ८ मा आम निर्वाचन हुँदैछ ।

साइफर प्रकरणमा इमरान खानमाथि कूटनीतिक कागजात रहेको आरोप छ । इमरान खानले यी कागजातहरू फिर्ता नगरेको आरोपपत्रमा भनिएको छ ।