काठमाडौं । एक प्रहरी जवानले श्रीमती र छोराको हत्या गरी प्रहरी कार्यालयमा पुगेर आत्मसर्मपण गरेका छन् ।

दाङमा एक प्रहरी जवानले श्रीमती र साढे २ बर्षीय छोराको हत्या गरेपछि जिल्ला प्रहरी कार्यालयमा पुगेका हुन् । जिल्ला प्रहरी कार्यालयमा कार्यरत प्रहरी जवान पिमलाल नेपालीले श्रीमती टिका बिक र साढे दुई बर्षिय छोरा शुशान्तको हत्या गरेको जिल्ला प्रहरी कार्यालय दाङले जनाएको छ ।

जिल्ला प्रहरी कार्यालयका डिएसपी जनकबहादुर मल्लका अनुसार पिमलालले घोराही स्थित एक होटेलमा श्रीमती र छोराको हत्या गरेका हुन् ।

रोल्पा रुण्टिगढीका पिमलाल श्रीमती टिका र छोरा शुशान्तसंग गएराती घोराही स्थित एक होटेलमा बास बसेका थिए । श्रीमती र छोरा शनिवार रोल्पाबाट घोराही आएका थिए ।

आइतबार बिहान पिमलालले श्रीमती टिका र छोराको हत्या गरेको डिएसपी मल्लले जानकारी दिए । श्रीमती सहित छोराको हत्या गरेका पिमलाल आफै जिल्ला प्रहरी कार्यालयमा पुगेर आफूले हत्या गरेको जानकारी गराएका थिए ।