म्याग्दी। जोमसोम–पोखरा हवाई सेवा करिब तीन महिनापछि आजदेखि संचालन भएको छ। गण्डकी प्रदेशको राजधानी पोखरादेखि पर्यटकीय जिल्ला मुस्ताङको जोमसोम विमानस्थलमा हुने हवाई यातायात सेवा प्रतिकूल मौसमका कारण गत मंसिर दोस्रो सातादेखि बन्द भएको थियो।

गत मङ्सिर २० गतेदेखि उडान बन्द गरेको सुमित एयरलायन्सले आजदेखि उडान भर्न थालेको जोमसोम विमानस्थलका प्रमुख हिरोण शाहले बताए। मंसिर १० गतेदेखि उडान रोकेको तारा एयरलाइन्सले पनि केही दिनमै जोमसोम–पोखरा उडान संचालन गर्ने तयारी गरेको छ। ‘मौसममा सुधार र पर्यटकीय याम सुरु भएकाले पोखरा–जोमसोम हवाई सेवा सञ्चालन गरिएको हो’, विमानस्थलका प्रमुख शाहले भने, ‘सम्मिट एयरलाइन्सले आज दुई उडान भरेको छ।’

बेनी–जोमसोम सडकको म्याग्दी खण्डमा स्तरोन्नति भइरहेको अवस्थामा हवाई उडान सुरु भएपछि मुस्ताङका बासिन्दा, तीर्थयात्री र पर्यटकलाई सहज भएको छ। हवाई सेवा सुरु भएपछि मुस्ताङमा पर्यटकको चहलपहल बढ्ने अपेक्षा गरिएको छ।

सन् २०२३ मा ९१ हजार विदेशी पर्यटकले मुस्ताङ भ्रमण गरेका अन्नपूर्ण संरक्षण क्षेत्र आयोजना (एक्याप) जोमसोमले जनाएको छ। गर्मी बढ्न थालेसँगै केही दिनयता बेनी–जोमसोम सडकमा भएर मुस्ताङ जाने आउने सवारी साधनको चाप बढ्न थालेको जिल्ला ट्राफिक प्रहरी कार्यालयका प्रमुख राजकुमार थापाले बताए।