ताप्लेजुङ। ताप्लेजुङको पाथीभरामा हालसम्म सङ्कलित सुनचाँदी लिलाम बिक्री गरिने भएको छ । पाथीभरामा हालसम्म सङ्कलन भएको १७८ तोला सुन र पाँच हजार तोलाभन्दा बढी चाँदीको लिलाम बिक्री प्रक्रीया सुरु गरिएको पाथीभरा क्षेत्र विकास समितिले जनाएको छ ।

समितिका कार्यकारी निर्देशक प्रजिन हाङ्बाङका अनुसार भक्तजनले चढाएको शुद्ध अर्थात् एक नम्बर सुन १७८ तोला ८२ लाल र पाँच हजार २९८ तोला १२ लाल असली चाँदी बिक्रीको प्रक्रीया अघि बढाइएको हो ।

गत मङ्सिर १६ सम्म पाथीभरामा सङ्कलन भएको सुनचाँदी बिक्री गर्न लागिएको कार्यकारी निर्देशक हाङ्बाङले जानकारी दिए । उनका अनुसार लिलाम बिक्रीको प्रक्रिया सुरु भएसँगै सुनको मूल्य प्रतितोला एक लाख २१ हजार रुपियाँ र चाँदीको मूल्य प्रतितोला एक हजार ४१० रुपियाँ कायम गरिएको छ ।

उक्त तोकिएको मूल्यमा सुन र चाँदी खरिद गर्नका लागि इच्छुक व्यक्ति वा फर्मलाई समितिले आह्वान गरेको छ । सुनचाँदी बिक्री गरेर प्राप्त हुने रकमलाई समितिको आम्दानीमा बाँधिने पाथीभरा क्षेत्र विकास समितिका अध्यक्ष रक्की थेबेले जानकारी दिए।

अध्यक्ष थेबेका अनुसार सुनचाँदी लिलाम बिक्रीका लागि समितिले बोलपत्र आह्वान गरेको छ । पाथीभरामा भक्तजनले चढाएका सुनका गरगहना र चाँदीका सामग्री प्रशोधन गरी शुद्ध बनाएर समितिले बिक्रीको प्रक्रीया अघि बढाएको हो ।