काठमाडौं । अमेरिकाका पूर्व राष्ट्रपति डोनाल्ड ट्रम्पले आगामी राष्ट्रपति चुनाव जिते भने सबैभन्दा पहिले देशको सीमा बन्द गर्ने र आफ्ना समर्थकलाई जेलबाट रिहा गर्ने घोषणा गरेका छन् ।

ट्रम्पले आफ्नो सोशल मिडिया प्लेटफर्म ट्रुथ सोशलमा भने ‘यदि म राष्ट्रपति बनें भने, म सबैभन्दा पहिले अमेरिकी सीमाहरू सील गर्नेछु। यसका साथै जनवरी ६, २०२१ मा क्यापिटल हिल हिंसाकाण्डमा मुछिएका व्यक्तिहरूलाई जेलबाट निकालिनेछ।

यसअघि पनि ट्रम्पले अमेरिकी सीमा बन्द गर्ने कुरा गर्दै आएका थिए । ट्रम्पको पहिलो कार्यकालदेखि नै अवैध शरणार्थीको मुद्दा ट्रम्पको एजेन्डाको शीर्षमा रहेको छ।

अमेरिकामा जनवरी ६, २०२१ मा क्यापिटल हिलमा ट्रम्पका समर्थकहरूद्वारा हिंसा भएको थियो। वास्तवमा, नोभेम्बर ३, २०२० को राष्ट्रपति चुनाव मतदानमा, बाइडेनले ३०६ भोट पाए र ट्रम्पले २३२ मत पाए। यी नतिजाहरु बाहिर आएसँगै ट्रम्प र उनका समर्थकहरुले चुनावमा धाँधलीको आरोप लगाउन थाले ।

यस अवधिमा क्यापिटल हिल हिंसाका घटनामा ११ सयभन्दा बढी व्यक्तिविरुद्ध मुद्दा दर्ता भएका छन् । देशद्रोहको मुद्दा पनि दर्ता भएको छ ।

यसपटक अमेरिकी राष्ट्रपति चुनावमा ट्रम्प र बाइडेन सम्भावित रूपमा आमनेसामने छन् । ट्रम्पले २०२० को चुनाव हारेको भए पनि यसपटक परिस्थिति बदलिएको छ। यसको कारण हो – यस पटक अमेरिकाको स्थानीय समस्या र विश्वव्यापी परिस्थिति फरक छ। यसपटक अमेरिकी राष्ट्रपति चुनावमा देशको अर्थतन्त्रदेखि शरणार्थी, परराष्ट्र नीति, जलवायु परिवर्तनलगायतका मुद्दाहरू महत्वपूर्ण छन् ।

गैरकानुनी आप्रवासीको मुद्दामा अमेरिकाका स्थानीय जनताले निकै आवाज उठाएका छन् । र यस मुद्दामा ट्रम्पको अडान सधैं स्पष्ट रहेको छ। उनले आफ्नो कार्यकालमा धेरै पटक अमेरिका–मेक्सिको सीमाको पनि भ्रमण गरेका छन् । पछिल्लो पटक पनि उनले अवैध आप्रवासीलाई कडा कारबाही गर्ने स्पष्ट पारेका थिए । यसपटक पनि उनले अवैध आप्रवासीको मुद्दामा बाइडेनलाई घेरेका छन् ।