काठमाडौं । ईयूका विदेश नीति प्रमुखले गाजा युद्धमा भोकमरीलाई हतियारको रूपमा प्रयोग भइरहेको दाबी गरेका छन् । जोसेप बोरेलले आवश्यक सहायताको अभावलाई “मानव निर्मित” संकटको रूपमा वर्णन गरे।

अत्यावश्यक खाद्यान्न बोकेको एउटा स्पेनी जहाज साइप्रसबाट गाजाको लागि प्रस्थान गरेको छ, तर संयुक्त राष्ट्रले यो सहायताले सडकबाट पठाइने सहायतालाई प्रतिस्थापन गर्न नसक्ने बताएको छ।

अर्कोतर्फ इजरायली प्रधानमन्त्री बेन्जामिन नेतान्याहुले अब दक्षिणी गाजामा जमिन आक्रमण सुरु गर्ने बताएका छन् ।

अहिलेसम्म मध्य गाजा र उत्तरी गाजाका सर्वसाधारणलाई दक्षिणी गाजा जान भनिएको थियो । यस्तो अवस्थामा गाजाको जनसङ्ख्याको ठूलो हिस्सा रफाह सीमा नजिकै बसोबास गरिरहेको छ । अहिलेसम्म यसलाई सुरक्षित भाग मानिन्थ्यो।

गाजामा सहायता पठाउनको लागि सडक मार्ग सबैभन्दा राम्रो तरिका हो। तर सहायता संस्थाहरूले इजरायलले यसमा प्रतिबन्ध लगाएको बताउँछन्, जसको अर्थ त्यहाँ पुग्न सक्ने सहायताको एकदमै थोरै अंश मात्रै पुगिरहेको छ।

अहिले हवाई र जलमार्गबाट ​​सहयोग पुर्याइएको छ । इजरायलले गाजामा खाद्यान्न अभावका लागि आफूलाई जिम्मेवार ठहराउनु उचित नभएको भन्दै सहायता उपलब्ध गराउन दुईवटा मार्ग खोलेको बताएको छ ।

मंगलबार न्यूयोर्कमा संयुक्त राष्ट्र सुरक्षा परिषद्लाई सम्बोधन गर्दै बोरेलले यस क्षेत्रमा बढ्दो मानवीय संकट सडकबाट सहायता पठाउन नसक्नुको कारण भएको बताए।

उनले भने- “यो जनसंख्या आफ्नो अस्तित्वको लागि लडिरहेको छ। मानवीय सहायता गाजामा पुग्नै पर्छ र युरोपेली संघले यसलाई सम्भव बनाउन सक्दो गरिरहेको छ।”