काठमाडौं । पञ्जाबी गायक सिद्धु मूसेवालाको मृत्यु भएको झण्डै दुई वर्षपछि उनका आमाबाबुले गत आइतबार आईभीएफ प्रविधिबाट जन्मेको दोस्रो सन्तानलाई स्वागत गरेका छन् । तर, उनका बाबुआमाको उमेरलाई ध्यानमा राखेर यो विषयमा विवाद सुरु भएको छ ।

मूसेवालाका बुबा बलकौर सिंहले भिडियो सन्देशमा प्रशासनले बालकको वैधानिकताको प्रमाण मागेर दुर्व्यवहार गरिरहेको बताएका छन् ।

पञ्जाब कांग्रेस नेता सुखजिन्दर सिंह रन्धावाले बलकौर सिंहको भिडियो ट्वीट गर्दै पञ्जाबका सीएम भगवन्त मानलाई निशाना बनाएका छन्।

सिद्धु मूसेवालाकी आमा ५८ वर्षकी भइन् । भारतीय कानुन अनुसार महिलाले अधिकतम ५० वर्षको उमेरसम्म मात्रै आईभीएफ मार्फत बच्चा जन्माउन पाउँछन् । पुरुषहरूको लागि कानुनी उमेर ५५ वर्ष हो।

सिद्धु मूसेवालाको परिवारका अनुसार उनले भारत बाहिर आईभीएफ उपचार गराए । बलकौर सिंहले ‘कम्तिमा उपचार सम्पन्न गर्न दिने कुरामा सरकारले दयालु बनोस्’ भन्दै अपिल गरेका छन् ।

उनले उपचार सकिएपछि सबै कागजात बुझाउने बताउँदै आफूले कुनै कानुन उल्लंघन नगरेको बताए ।

वास्तवमा, केही मिडिया रिपोर्टहरू अनुसार केन्द्रीय स्वास्थ्य मन्त्रालयले यस सम्बन्धमा जवाफ माग्दै पञ्जाबको स्वास्थ्य मन्त्रालयलाई पत्र लेखेको छ।