काठमाडौं । रुसी राष्ट्रपति भ्लादिमिर पुटिनले शुक्रबार साँझ मस्कोको क्रोकस सिटी हलमा भएको गोलीकाण्डलाई बर्बर चरमपन्थी आक्रमणको संज्ञा दिएका छन् ।

यस हमलापछि शनिबार आफ्ना देशवासीलाई सम्बोधन गर्दै पुटिनले क्रोकस सिटी हलमा दर्जनौं शान्तिप्रिय र निर्दोष व्यक्ति अतिवादी हमलाको निशाना बनेको बताए।

उनले यस हमलामा मारिएकाहरुका परिवारप्रति समवेदना व्यक्त गरेका छन् ।

पुटिनले आक्रमणपछि मानिसको ज्यान बचाउन प्रयासरत एम्बुलेन्स कर्मचारी र उद्धार टोलीका मानिसहरूप्रति कृतज्ञता व्यक्त गरेका छन्।

उनले यस घातक हमलामा संलग्न चारै बन्दुकधारीलाई पक्राउ गरिएको बताए । यस आक्रमणमा हालसम्म १३३ जनाको मृत्यु भइसकेको छ । सयौं घाइते भएका छन् ।

शुक्रबार साँझ, यी बन्दुकधारीहरू मस्कोको क्रोकस सिटी हलमा प्रवेश गरे र मेसिन गनले फायरिङ गर्न थाले।

यो हल मस्कोमा संगीत कन्सर्टहरूको लागि सबैभन्दा ठूलो ठाउँहरू मध्ये एक हो, जहाँ लगभग छ हजार मानिसहरू एक पटकमा उपस्थित हुन सक्छन्।

पिकनिक ग्रुपको कन्सर्टमा सहभागी हुन आएका हजारौंको संख्यामा यस हलमा उपस्थित थिए । कन्सर्टका सबै टिकट बिक्री भइसकेका थिए ।