काठमाडौँ । अभिनेता फरदीन खान १४ वर्षपछि सञ्जय लीला भन्सालीको सिरिज हीरामण्डीबाट कमब्याक गर्दैछन् । निर्माण पक्षले पोस्टर सेयर गरेर यो जानकारी दिएको हो ।

उनले यस पिरियड ड्रामा सिरिजमा अली मोहम्मदको भूमिका निर्वाह गर्नेछन् । फरदीन अन्तिम पटक २०१० मा आएको फिल्म ‘दुल्हा मिल गया’ मा देखिएका थिए । त्यसयता फरदीन फिल्म पर्दाबाट गायब भएका थिए ।

फरदीनले सन् २००१ मा फिल्म ‘प्रेम अगन’ बाट बलिउडमा डेब्यू गरेका थिए । यो फिल्म उनका बुबा फिरोज खानले निर्देशन गरेका थिए । फरदीनले आफ्नो करियरमा ‘नो एन्ट्री’ र ‘हे बेबी’ जस्ता मल्टिस्टार फिल्ममा अभिनय गरेका थिए तर उनी कहिल्यै एकल हिट भएनन् । सन् २०१० मा रिलिज भएको ‘दुल्हा मिल गया’ उनको अन्तिम फिल्म थियो ।

सञ्जय लीला भन्सालीको आगामी सिरिज हीरामंडी लामो समयदेखि चर्चामा छ । यस सिरिजमा मनिषा कोइराला, सोनाक्षी सिन्हा, अदिति राव हैदरी, ऋचा चड्ढा, सञ्जीदा शेख, शर्मीन सहगल, फरिदा जलाल जस्ता कलाकारहरुको अभिनय रहनेछ ।

सिरिजमा जम्मा ८ एपिसोड हुनेछन् । यो शृङ्खला मे १, २०२४ मा नेटफ्लिक्स मा रिलिज हुनेछ ।

रिपोर्टका अनुसार हिरामण्डीको इतिहास ४५० वर्ष पुरानो छ । यो पाकिस्तानको लाहोर सहरको एउटा क्षेत्र हो । यसलाई ‘शाही मोहल्ला’ पनि भनिन्छ । उज्बेकिस्तान र अफगानिस्तानका महिलाहरू हिरामण्डीमा आउने गर्थे । यहाँ आएर उनी शास्त्रीय नृत्य र गीत गाउने गर्थे । अकबरको शासनकालमा हिरामण्डीलाई ‘शाही मोहल्ला’ भनिन्थ्यो ।