काठमाडौं । इजरायल र हमासबीच युद्ध सुरु भएको ६ महिना भइसकेको छ । यसैबीच इजरायली सुरक्षा बलले गाजा पट्टीमा हालै भएको हवाई हमलामा हमास नेता इस्माइल हानियाका तीन छोराको मृत्यु भएको पुष्टि गरेको छ ।

इजरायली सेना आइडीएफले दावी गरेअनुसार हानियाका तीन छोराहरू अमीर, हाजेम र मोहम्मद गाजामा आतंकवादी गतिविधि गर्न जाँदै थिए जब तिनीहरू हवाई आक्रमणमा परे।

इस्माइल हानियाले अल जजिरासँगको अन्तर्वार्तामा आफ्ना चार छोरामध्ये तीन जना जेरुसेलम र अल-अक्सा मस्जिदलाई स्वतन्त्र गराउने युद्धमा शहीद भएको बताएका छन्।

उनले भने – शत्रुले हमास नेताका परिवारलाई निशाना बनाएर हामीलाई झुकाउनेछन् भन्ने सोचेको छ। यसले हामीलाई हाम्रा मागहरूबाट पछि हटाउन सक्ने छैन । यदि कसैले मेरा छोराहरूलाई निशाना बनाएर हमासलाई आफ्नो अडान परिवर्तन गर्न बाध्य पार्छु भन्ने लाग्छ भने त्यो भ्रम हो।

यसअघि इस्माइल हानियाका नाति जमाल मुहम्मद हानिया पनि इजरायली हवाई आक्रमणमा मारिएका थिए । हानियाका धेरै आफन्तहरू हालसम्म इजरायली सेनाको आक्रमणमा मारिएका छन्।

हानियाकी नातिनी रोआ हम्माम इस्माइल हानिया पनि हवाई आक्रमणमा मारिएकी थिइन् । उनी गाजा विश्वविद्यालयमा मेडिसिन पढ्दै थिइन्। यसबाहेक इजरायली हमलामा हानियाका भतिजा र भाइको पनि मृत्यु भएको दाबी गरिएको छ ।

गाजा पट्टीको शरणार्थी शिविरमा २९ जनवरी १९६२ मा जन्मिएका हानिया अध्ययनकै क्रममा हमासमा सामेल भए । सन् २००६ मा हानिया प्यालेस्टाइनको प्रधानमन्त्री भए । धेरै वर्षअघि उनी गाजा पट्टीबाट भागेर कतार आएका थिए । हानिया हाल कतारमा निर्वासित जीवन बिताइरहेका छन् ।

अक्टोबर ७ मा इजरायलमा हमला हुनुअघि हानियाले भनेका थिए, ‘हामीले अब हाम्रा जनतामाथि हुने अत्याचार र पश्चिमी समर्थनका सम्बन्धमा सबै कुरा अन्त्य गर्ने निर्णय गरेका छौँ, जसले गर्दा शत्रुले आफू जिम्मेवार नभई खुसीसँग बाँच्न नसक्ने कुरा बुझोस् ।