काठमाडौं । अमेरिकाको मिसौरीमा बहिनी र उनका श्रीमानको हत्या गर्ने एक दोषीलाई मृत्युदण्डको सजाय दिइएको छ । उनलाई विषालु सुई लगाइएको थियो ।

अमेरिकी सञ्चारमाध्यम ‘फक्स २ नाउ’का अनुसार आरोपितलाई सुई लगाएपछि ११ मिनेटसम्म तड्पिरहे । त्यसपछि उनलाई मृत घोषणा गरियो। उनलाई मंगलबार साँझ ६ बजे घातक इन्जेक्सन दिइएको थियो । उनको ६:११ मा मृत्यु भयो। ५२ वर्षीय दोषी ब्रायन डोर्सीले सन् २००६ मा आफ्नी बहिनी र उनका श्रीमानको हत्या गरेका थिए ।

२३ डिसेम्बर २००६ मा दोषी ब्रायन डोर्सीले बहिनी सारासँग लागुऔषध कारोबारीहरूलाई दिनको लागि केही पैसा मागेका थिए। साराले पैसा दिन मानिनन् । यो देखेर रिसाएका ब्रायन आफ्नो घर फर्किए तर राति बहिनीको घर फर्किए । जब सारा र उनका पति बेन सुत्न जाँदै थिए, ब्रायनले उनीहरूलाई आक्रमण गरे।

दुवैलाई गोली हानिएको थियो । साराको मृत्युपछि उनको शरीरमा यौन शोषण भएको थियो । घरबाट केही बहुमूल्य सामान चोरी पनि भएको थियो । ब्रायनले लागुऔषध कारोबारीलाई पैसा तिर्न यी वस्तुहरू बेचेका थिए। घटनाको भोलिपल्ट साराका अभिभावक उनको घर पुगेका थिए । यहाँ श्रीमान श्रीमतीको शव फेला परेको थियो ।

सारा र बेनको शव पहिलो पटक साराका अभिभावकले देखेका थिए । घर पुग्दा सारा र बेनकी ४ वर्षीया छोरी घरमा टिभी हेर्दै थिइन् । उनले हजुरबा हजुरआमालाई भनिन्, “आमा उठ्नु भएको छैन।” घटनाको तीन दिन पछि अर्थात् २६ डिसेम्बर २००६ मा, ब्रायनले प्रहरीसमक्ष आत्मसमर्पण गरे। उनलाई २८ अगस्ट २००८ मा मृत्युदण्डको सजाय सुनाइएको थियो।