काठमाडौं । अमेरिकी अर्थमन्त्री जेनेट येलेनले इरानले शनिबार इजरायलमा गरेको आक्रमणपछि अमेरिकाले “आगामी दिनहरूमा” इरानमाथि नयाँ प्रतिबन्ध लगाउन सक्ने बताएकी छिन् ।

येलेनका अनुसार इरानको तेल निर्यात “एक सम्भावित क्षेत्र हो जुन प्रतिबन्धको अधीनमा हुन सक्छ।” उनले इरानको कारबाही मध्यपूर्वमा स्थायित्वका लागि ठूलो खतरा भएको बताइन् ।

“यस शनिबारको आक्रमणदेखि लाल सागरमा हुथी विद्रोहीहरूले गरेको आक्रमणसम्म, इरानको कार्यले क्षेत्रको स्थिरतालाई खतरामा पार्न सक्छ र आर्थिक नोक्सानी निम्त्याउन सक्छ,” उनले चेतावनी दिइन् ।

वाशिंगटनमा येलेनले भनिन् – ट्रेजरीले आफ्नो प्रतिबन्धको अधिकार प्रयोग गर्नेछ र इरानी शासनको खराब र अस्थिर गतिविधिलाई रोक्न जारी राख्न सहयोगीहरूसँग काम गर्नेछ ।

यसअघि इजरायलले ३२ देशलाई पत्र लेखेर इरानमाथि प्रतिबन्ध लगाउन माग गरेको थियो । इजरायलका विदेशमन्त्रीले इजरायलको रिभोलुसनरी गार्ड कोर्प्सलाई ‘आतंकवादी संगठन’ घोषणा गर्नुपर्ने बताएका छन् ।

गत शनिबार इरानले पहिलो पटक आफ्नो भूमिबाट इजरायलमा ३ सय मिसाइल प्रहार गरेको थियो । इजरायलले लक्ष्यमा प्रहार गर्नु अघि धेरै क्षेप्यास्त्रहरूलाई बेअसर गरेको दाबी गरेको छ।

अप्रिल १ मा सिरियास्थित इरानी वाणिज्य दूतावासमा भएको आक्रमणको जवाफमा इरानले यो हमला गरेको हो । यस हमलामा कुल १३ जनाको ज्यान गएको थियो जसमा इरानको रिभोलुसनरी गार्डका शीर्ष कमाण्डर र उनका सहायक पनि मारिएका थिए ।

इजरायलले यस हमलाको जिम्मेवारी लिएको छैन तर यो आक्रमण इजरायलले नै गरेको मानिन्छ।